公屋派青衣長康邨262呎單位 港媽攜兩幼童陷兩難：咁細點間兩房？網民熱議「荒島」配套 vs 交通神級便利｜Juicy叮
發佈時間：13:00 2026-11-01 HKT
一名育有兩名分別5歲及9歲小朋友的單親港媽在社交平台發帖求助，表示自己屬於「擴展市區超額/普通申請（擴3）」，近日終於迎來公屋「第一派」，不過，當她打開房屋署的配房通知信時，卻陷入了無盡的糾結之中。
首派青衣長康邨 單親媽攜2幼童派262呎單位
從樓主分享的房屋委員會發出的「配房通知信」，可見她獲配的屋邨為「長康邨」，座數則是「康順樓」高層單位。
得知獲配結果後，樓主表示單位面積為262平方呎（即約24.3平方米），月租約一千五百多元。想到要與兩個日漸長大的小朋友同住，她不禁憂心忡忡，遂在網上發文向街坊打聽意見：「請問有平面圖嗎？搵左好耐都冇。我加2個小朋友5＆9歲，262尺，各位點睇？環境？考慮因素：咁細，點間2房好？衛生環境尚可嗎？好驚多曱甴，爬文話好多空中飛人？有啲恐怖，希望住嗰度嘅街坊們比啲意見。」
網民兩極化熱議：配套如「荒島」 vs 交通極方便
帖文隨即引來大量網民及長康邨街坊熱烈討論。對於單位的實用性及周邊配套，網民意見兩極：
痛點一：262呎「極細」難間房
不少網民直言，3個人住262呎實在太逼，想要間兩房近乎是不可能的任務：「我派過，完全唔掂。小朋友空間極少，兩房唔洗諗。」「我地3個大人，完全介唔到2房，勁細房。又遠所以拒絕左。」「真心介唔到，以前我地介左個細房比我家姐住，然後其餘三個都係訓廳。」
不過，也有同座的鄰居現身說法，分享如何「神改造」單位：「門口右邊間兩間房，因單親，三張都係3呎床。可能做雙人床間房，你們覺唔夠位？還是放左張大床後你們覺無衣櫃，所以覺唔得？」也有街坊分享：「對面家都係兩個小孩，我兩小孩己經大，一家4口住20年，最緊要平租，一眼睇曬小孩日常活動，可做上格床下電腦枱同衣櫃。」
痛點二：康順樓周邊如「荒島」？
不少網民指出，長康邨雖然有商場，但康順樓偏偏位於較偏僻的位置：
「我答你，我住左4-5年，我覺得荒島一個，得間細百佳同幾間餐廳，但超難食。街市得幾檔，買嘢要出荃灣。」「康順樓下荒島咁。」「有兩期商場，你果座係近長康巴總，有啲茶記同百佳。麥當勞就近長青巴總果邊，係一期商場。所以都算有啲遠，二期去一期真係要15分鐘左右。」
優點：校網優越、交通出奇地快
儘管配套被指不足，但長康邨在校網和交通上卻獲得一致好評，甚至完勝東涌：「交通好方便，校網一定比東涌好，有茶餐廳同街市仔，隔離有游泳池體育館。我住係到30年，都唔洗點搭鐵都有好多巴士出去。」「康順既位置係3號幹線/青嶼幹線附近，又有X車出去，仲快過搭地鐵。出cwb（銅鑼灣）講緊半個鐘內添。」
樓主也十分認同校網的差距：「認同，未派前係預佢比東涌，仲諗緊日日要早幾多返學，所以見到青衣就即時要認真度度。」
衛生與治安疑慮：鄰里質素成關鍵？
對於樓主擔心的「曱甴老鼠」與「空中飛人」治安問題，網民認為主要看鄰居和運氣：「康順樓近山邊，記得以前真係各底昆蟲都有，草蜢，炸猛，曱由鹽蛇都有齊，特別康順近街市個邊出口真係好多曱由，細個試過有次打風落雨前有十幾隻係個到。」「曱甴最主要睇你隔離屋住咩嘢人。」
有網民更提醒長康邨可能有不少「怪鄰居」：「千析唔好要，康祥 康順勁多白卡，長期有人搬出搬入 搞房署翻新，返夜既一定唔會訓到。」、「我細個隔黎屋就係顛既，以前比佢嚇，康順同左都有兩三個顛。」
到底博唔博「二派」？
由於這是樓主的第一派，許多網民紛紛建議她「博二派」，但也提醒要有心理準備可能越編越遠（例如東涌）：「梗係博啦，今次派262呎，下次應該派到四百幾呎新樓添。博一博，單車都可變摩托。」「3-4人單位點會有400幾尺，俾我都會博，200幾太細。」「博2派啦，但要有預備可能派東涌。環境東涌就好啲，又新樓又大啲，3個人200幾太細喇。」
面對街坊們熱心的意見，樓主表示自己帶同兩名小朋友親自到現場視察後，深感帶着孩子在該區行走確實有些吃力，坦言需要再認真考慮。
來源：公屋討論區 - 香港facebook群組
延伸閱讀：苦等14年派公屋油麗邨靚位 開信驚見「4字備註」兼無得睇樓？事主揭特殊內幕陷兩難
