的士司機豪氣免收「大額」尾數 港女驚呼：中咗六合彩？ 意外釣出網民「全單免費」超狂經歷｜Juicy叮
發佈時間：10:39 2026-09-19 HKT
一位女乘客近日搭的士，驚喜遇上豪氣抹去「大額」車資尾數的「神仙司機」，令她震驚高呼對方是否「中咗六合彩」。這宗神級奇遇在網上曝光後，意外釣出大批網民自爆更狂的「全單免費」經歷。詳情見下圖及下文：
的士司機豪氣免收「大額」尾數 港女驚呼：中咗六合彩？ 意外釣出網民「全單免費」超狂經歷逐張睇↓↓↓↓
樓主：咁好人真係無法相信
樓主早前（17日）在社交平台 Threads發帖分享這場的士奇遇。她表示，當日落車時錶示為 $108，豈料司機大佬竟然主動開口說：「$100 得喇叫我畀 $100。」
樓主心想用電子支付免卻找贖麻煩，便主動提出「我想畀八達通，叫佢照收啦」，結果司機依然「任性」地硬撳 $100 收費。這份突如其來的慷慨讓樓主當場嚇傻，忍不住在網上大呼：「請問司機你是咪中咗六合彩？竟然咁好人我真係無辦法相信！」
網民酸爆：女士限定
網民大讚這宗「好人好事」實在「難得」。不過，一眾男網民隨即酸爆指出，這份溫柔絕對是「女士限定」，字字見血地調侃：「你試下係仔，一蚊都罵到你Ｘ街！」
對此，有網民指出，這其實是雙向的奔赴：「好人好事！都可能因為樓主你係有品乘客。」亦有的士業界同行深表認同地回應，直指甚麼樣的乘客，會直接影響司機對客人的態度。
網民自爆更狂「免單」神蹟
而一眾經歷過的士大佬佛心對待的幸運兒，也湧現自爆感人奇遇。
有媽媽分享早幾年帶 4 歲兒子搭的士去健康院，車資 $40 多，結果因為兒子戴著口罩被司機誤當成女仔，司機哥哥為了「要同我仔 Sor（道歉）」竟然堅持免單，媽媽強塞 $50 也不收，最後因為有公公婆婆要上車而匆匆致謝，感性祝願司機哥哥一世無憂。
又有學生分享當年上學差點遲到，落的士時司機見他心急如焚，竟安慰他「唔會遲到㗎」，更拒收他拿出的 $100 鈔票，豪氣地說「仲要找錢啊，唔使啦，快啲返學啦」，雙方僵持了 1 分鐘，最後學生因為趕時間唯有感動落車。
甚至有網民回憶起小時候搭的士趕上學，跳錶到 $60，打開銀包才發現只得 $40，正當他無助時，司機卻溫柔地安慰說：「算啦 $40 啦，下次早啲出門口，唔好嘥錢搭的士，留返啲錢返學校食嘢。」暖心舉動令人一世難忘。
網民：司機唔憂做？
這些「神仙司機」到底是甚麼來頭？有網民估計，這班「不憂做」大佬各有隱藏背景，笑指「聽過個的士佬話自己係買咗個牌無聊就揸下打發下時間，心情靚就收順啲」，更有人估計，他們「退休純粹為樂趣，不太重視零頭尾數，志在兜下風」。
資料來源：yukying0＠Threads
相關閱讀：
的士客「上酒吧拎嘢馬上走」 多付40元車資求原地等 司機苦候20分鐘趕交更走人惹熱議
八號波搭的士遇良心司機 無劏客堅持按咪錶收費 打工仔感動加車資至「呢個銀碼」
的士司機急尋一家三口致謝 獲贈「咁多」小費渡人生低潮 網民眼濕濕：保留住先當護身符
