颱風樺加沙｜超強颱風來勢洶洶網民憶「山竹」災情抽氣扇屋頂橫飛爬樹返工｜Juicy叮

更新時間：11:39 2025-09-20 HKT
發佈時間：11:39 2025-09-20 HKT

「樺加沙」有機會增強至超強颱風強度並移近香港，面對這個來勢洶洶的風暴，網民紛想起2018年9月16日襲港的另一股超強颱風「山竹」，各自憶述當年親身經歷的災情。詳情見下圖及下文：

颱風樺加沙｜超強颱風來勢洶洶網民憶「山竹」災情逐張睇↓↓↓↓

村屋樓主：「山竹」吹走廁所抽氣扇

樓主前日（18日）在社交平台Threads以「颱風」為題發帖想當年，指「仲記得當年『山竹』，我仲同緊屋企人住喺村屋，嗰陣風力太強，村屋啲嘢又好舊，個風將廁所成個抽氣扇吹走咗，一大個窿喺度。再深刻嘅係，呢件事係發生喺我屙屎中途，一路屙屎，啲風雨一路撇入嚟，仲要喺廁所入邊大叫媽咪拎把遮俾我擔住屙屎」。

樓主描寫得相當直白，回應的網民形容充滿「畫面感....」，笑言「想像個畫面應該好驚，但又好好笑，如個連屋頂都吹走埋，更似笑片啲情節」。

村屋網民：屋頂飛落後花園

「山竹」襲港，在香港風暴史上寫下重要一頁，不少網民對當年的災情記憶猶新，有同樣住屋村的網民上載屋頂橫飛的相片話舊，留言指：

「村屋+1，有鄰居個僭建屋頂飛咗落我屋企個後花園。嗰陣啱啱瞓醒喺廁所發吽哣咁刷緊牙，佢跌落嚟嗰下澎一聲，成個人醒曬......嗰下嚇到大叫，我媽仲話『打風有嘢跌落嚟好正常啊，唔使大嗌啊？』，之後冇耐鄰居send（傳）咗個wts（whatsapp）過嚟話『有個屋頂飛咗落你嗰邊wo』，同兩位長老講時，我媽：？？？，我老豆即開窗睇咩情況」。

另有村屋居民指「住村屋3x年，第一次水浸就係『山竹』，下星期又話個風好勁，真係唔想水浸，『山竹』嗰年，我嗰邊都好多人嘅外面棚，好多嘢都吹走咗」、「我都係住村屋，當年『山竹』，睇住對面間鐵皮屋吹走咗部分屋頂，嚇死」。

公屋居民：「山竹」吹起乒乓波枱打斷樹

另有公屋居民憶述「當年『山竹』，最印象深刻係屋邨張無輪乒乓波枱吹咗走再打斷樓下棵樹。講緊張乒乓波兩個大男人都要好大力至抬得起少少，個風係吹起咗佢，好癲」。

另有人指「『山竹』唔係講笑，當年仲吹到屋企啲窗邊全部入水…（應該係膠邊老化）到而家都未整過，如果今次同『山竹』一樣就大鑊，吸成日水」。

網民銘記爬樹返工

有媽媽級網民則回顧作動一刻，「同當年『山竹』，啱啱作動又難產要開刀，嗰日喺病房睇住窗外風雨聲嘈到好似火車經過咁，心想如果喺古代我應該同個仔一早瓜咗」。

香港市面慘遭「山竹」蹂躪，一街塌樹，落波後打工仔「爬樹返工」的場面此起彼落，有人至今仍在抱怨「當年『山竹』我做緊牛角，都係住村屋，仲要地下，有棵樹喺正門口冧咗，影相俾阿頭，佢係咁叫我諗辦法跨過去返工，可以claim（索取）返$50的士錢」。

「山竹」回顧：10號風球｜「山竹」肆虐「我要返工」改圖成經典

市民對2018年的「山竹」肆虐記憶猶新，其引發的風暴潮，導致維港水位上升達到2.35米，打破「溫黛」（1962年9月1日襲港）的紀錄；與「天鴿」（2017年8月23日襲港）相比，「山竹」所引致的暴雨、風暴潮及巨浪造成的破壞更為嚴重，超過6萬宗的塌樹報告，數目是有記錄以來最多，市民趕返工跨過行人路上倒塌的大樹，場景至今仍歷歷在目。當年引發起不少改圖，當中以「我要返工」為主題的改圖最能引起打工仔的共鳴。

受「山竹」吹襲，全港有至少500宗玻璃窗或玻璃幕牆損毀報告，當中紅磡海濱廣場二期、灣仔、中環、旺角有商業大廈玻璃幕牆爆裂，及將軍澳有住宅單位的玻璃窗被吹毀等，全港超過4萬戶電力供應中斷，停電亦引致部分地方的食水供應受到影響，其中杏花邨多幢大廈停水停電數天。「山竹」共造成458人受傷。

「山竹」因破壞力太強，導致多國死傷嚴重，世界氣象組織颱風委員會通過將「山竹」除名。

天文台為「樺加沙」發「特別天氣提示」

天文台在今日凌晨發出的「特別天氣提示」中指出「預料熱帶氣旋『樺加沙』會在未來一兩日移向呂宋海峽一帶並顯著增強，有機會達超強颱風強度，在下週初進入南海北部。按照現時預測，樺加沙會在下週中期靠近廣東沿岸，本港天氣將會轉壞，風勢顯著增強，有狂風大驟雨及雷暴。海有非常大浪及湧浪。由於屆時風暴潮可能相當顯著，沿岸地區有機會出現水浸。市民請留意天文台最新天氣消息及做好準備」。

9月8日，颱風「塔巴」殺到，有網民目擊有兩父女到惠康狂掃辛辣麵，一人一車，將整個貨架上的辛辣麵全搶一空，樓主驚訝地表示：「打風定打仗？」路過阿姨則以4字嘲諷這對父女，惹來網民讚賞。以下為當時過程↓↓↓↓

答問卷拎禮品︰市民對2025《施政報告》滿意程度」問卷調查
↓立即下載星島頭條App↓