港人廣州酒店疑被踩線男死跟 起戒心不入房疑匪突「咁做」 事主震驚：我覺得有啲危險｜Juicy叮
發佈時間：13:53 2025-08-19 HKT
有港男與女友北上廣州住酒店，遇到懷疑竊匪「踩線」瘋狂死跟，港男分享驚險經歷表示自己一度企在電梯門口不入房，誰料該踩線男仍沒有知難而退，繼續做出一些舉動，令他感到「有啲危險」。
事主亦交代最後如何成功撇甩踩線男的跟蹤，詳情如下：
港人廣州酒店疑被踩線男死跟 起戒心不入房疑匪突「咁做」 事主震驚：我覺得有啲危險↓↓↓↓
有網民在社交平台發帖表示，在上周六（8月16日）他與女友北上廣州，住進天河區一間酒店，當日兩人返酒店時，迎面遇到一名男子正離開酒店。
樓主和女友在等電梯上房時，「等等下呢條友，調頭返嚟同我哋一齊等𨋢」，該男子去而復返，樓主即時警剔起來：「成件事我覺得有少少鬼，但都覺得佢可能漏咗嘢返轉頭拎啫。」
事主：成件事我覺得有少少鬼
樓主表示：「我一入𨋢慣性地㩒咗樓層，點知條友無㩒𨋢，太鬼了吧？」該男子入電梯後，又「自己攞住部電話（扮）講嘢」。
樓主和女朋友即「醒水」，電梯「到咗都唔出去」，「點知佢都唔出！我等咗四至五秒，佢先硬住頭皮行出去。」
樓主和女友其後出電梯，「為免畀佢知我哋住邊間房，我就企喺𨋢口等佢入房」，事主起戒心拒入房，以為可以令疑匪知難而退，但該男子竟「兜咗成3分鐘都未入到房，仲喺度扮揾房」，繼續伺機而動。
「入咗房一分鐘，聽到條友喺我哋房出面徘徊」
樓主表示這時「我覺得有啲危險」，他即「去返𨋢口㩒『上』掣，然後周圍行唔入房」，該踩線男最後走回電梯口，樓主「就跟佢行去𨋢口，企喺佢隔離望住佢，佢先死死地氣入𨋢走」。
樓主目送該踩線男步入電梯，即急急與女友入房，但是「入咗房一分鐘，聽到條友喺我哋房出面徘徊」，樓主表示，他其後即通知酒店，酒店職員有翻看監控影片，但至出帖時仍未有向他交代跟進情況，他形容酒店職員「唔係好熱心想處理呢件事」，樓主要求換房，但無奈其他空房仍位處同一層樓，最後樓主決定為安全計更換酒店。
事主已搬酒店：真係要夠alert
帖文引發熱烈迴響，有網民形容踩線男膽大包天：「佢都幾大膽，你已經係男人，都夠膽跟你哋。」「係酒店踩線咁癲，好彩你夠alert。」樓主表示有防備是因為「佢太明顯啦」。
有網民懷疑該男子會否與酒店職員「裡應外合」，樓主認為應該不是：「判斷就唔似。」至於這名踩線男的動機，樓主表示最終仍未清楚，但懷疑他有機會是酒店老鼠，「驚佢做標記，之後先再嚟（偷竊）」。
有網民指酒店大多要先拍卡才可按樓層，「就算係同一樓層住客習慣都會先拍卡再㩒樓層制，如果條友大安旨意等你㩒制就好有懷疑」，樓主回應表示：「廣州好似都有唔少都係咁，不過已經轉咗間好好多嘅。」
有網民提醒事主指起初有懷疑時，便不應出電梯，「唔妥仲出𨋢？細路你真係太年輕！」樓主解釋：「當刻未確定真係有問題。」他又提醒網民「真係要夠alert（警覺性）」。
來源：kenson_seto＠Threads
同場加映：港女皇崗口岸疑遇迷暈黨 三度碰面企到好埋 一除口罩由頭暈到尾↓↓↓↓
