便利店支付寶充值$500驚變$5000 好心港女歸還$4500 收銀員竟然咁樣做|Juicy叮

更新時間:15:28 2025-07-28 HKT
發佈時間:15:28 2025-07-28 HKT

有港女到便利店替支付寶充值元500後,望一望單據值竟發現增值的銀碼大增10倍驚變5000元,在嚇壞的同時也好心地給收銀員歸還多出的4500元。過程期間,對方竟然做出一件一時間令人難以理解的事。詳情見下圖及下文:

便利店支付寶充值$500驚變$5000 好心港女歸還$4500 收銀員竟然咁樣做逐張睇↓↓↓↓

$500變$5000 樓主:前所未有咁多錢

樓主昨日(27日)在社交平台Threads發帖,指「頭先去7仔(7-11便利店)入500蚊落Alipay HK(支付寶香港),點知個收銀打錯咗5000蚊,我望一望張單,再望一望個APP,前所未有咁多錢,梗係即刻返轉頭俾返$4500個收銀,唔係佢要自己貼。我覺得呢單嘢可以講一世」。

樓主接著在回應欄補充,指「職員係掃咗100枝45蚊嘅『珮夫人』(止咳露),我俾錢還返去。雖然我唔知佢哋帳目可以點對返」。

對於有網民查問「點解唔用轉數快」時,樓主回應稱「佢冇呢個option(選項),個職員打電話去問咗好耐,最後攞咗枝45蚊嘅『珮夫人』掃咗100次,等我俾返」,她並指事發時「重點係,真係好多錢,真係一睇單即刻發現」。

有謹慎的網民查詢「老友,唔係話唔信你,有冇圖睇吓?一次過係增唔到$5000要分開增㗎」,樓主大方展示交易截圖作證。另有人好奇「仲有2毫去咗邊?」,樓主於是也附圖解釋,指這是「簽到奬,自動扣」、「消失嘅2毫,係A+簽到奬,自動扣咗」。

相關閱讀:小心!八達通離奇收款$500 伴隨威嚇退款電話 事主求救網民疑新型騙局 官方回應教咁處理

樓主:唔還返去對唔住自己

原來有網民也遇上相似經歷,留言分享,樓主亦有現身回應:

•「我都試過。當初我去Circle K(OK便利店)入$500然後睇咗下多咗好多錢,然後轉返$4500俾佢」;

•「我今日去超市都遇過差不多同樣事,買飲品$9,我俾$10找,找錢收到$9。我行了兩步後我和店員都各自發覺問題,最後更正番交易」。

網民甲:好少好似你咁好,以前份工有同事收少咗錢,個客有留電話,打返俾佢話收少咗錢希望佢嚟補返,個客無返嚟,同事要全數賠返。
樓主:好慘......我就係諗住可能要佢賠先快啲俾返佢。

網民乙:我都試過係OK交管理費,個收銀員ee(姨姨)找多咗啲錢,跟住我望望佢,望望啲錢,然後同佢講應該無咁多,個ee好開心。人哋打分工,無謂叫人難做。
樓主:真,無謂要人哋賠。

網民丙:我試過買嘢飲,八達通俾錢,婆婆$38按錯$3.8,俾完之後感覺好爽,第日個心唔安樂去俾返錢。
樓主:始終唔係自己嘅錢,唔還返去對唔住自己。

網民丁:雖然你好好人,但唔建議你就咁轉俾佢,最好都係搵返Alipay(支付寶)客服退返錢過去。
樓主:冇諗到呢招,下次我識啦。
網民丁:係呀,幾千蚊唔係多,但個店員收咗佢唔俾返7仔,到7仔報警嗰陣你又係麻煩。

網民戊:我都試過……,最後佢用個啲類似點數卡既嘢嘟番$4500走。
樓主:另一位可以講一世嘅朋友。

相關閱讀:八通達增值離奇變「減值」?!夫婦便利店增值$200 八達通反減剩$14 7-Eleven回應公開最新調查結果

網民:好人好事 祝你中六合彩

於是有人稱「真好人好事,7仔員工好多收入唔算太高,咁樣賠一賠好慘烈」,不少民也讚好樓主的做法——「敬佩你」、「好人好事 」、「俾個讚你」、「誠實小寶寶」、「好人,有品德」、「便宜莫貪,做得好」、「好人有好報,祝你中六合彩」、「多謝你嘅正直善良,令呢個世界多一點美好」。

資料來源:arashi_kwong@Threads

相關閱讀:八達通增值小心!大埔驚現「搶拍卡黨」 趁事主便利店增值飛身搶拍卡:「我大聲問佢做乜,佢話...」↓↓↓↓

八達通增值小心!多名大埔網民今年3月18日先後在網上留言,指在便利店增值時,遇到有人等職員按掣後,「飛身走埋嚟拍咭」,企圖混水摸魚,有事主即時喝止:「大聲問佢做乜!」結果換來對方以下回應↓↓↓↓