巴士車長停車高速公路與大叔爭執：「你好似好唔滿意我咁！」情緒激動續揸車掀爭議｜Juicy叮
發佈時間：11:18 2025-07-23 HKT
有巴士車長駕至高速公路時，因有大叔在車內大聲播片被辣㷫，在高速公路停車發惡與一名大叔爭執，期間情緒非常激動：「依家你騷擾到我呀！......你好似好唔滿意我咁！......我依家開唔到車啦！」
目擊乘客指，兩人爭執後，司機在眾多乘客要求下，繼續駕駛，令他感到「好驚」和「不安」：「見到個司機情緒高漲去開車、講自己揸唔到車，即使你知道佢做嘅嘢係啱，都會感到不安。」
巴士車長停車高速公路與大叔爭執：「你好似好唔滿意我咁！」情緒激動續揸車掀爭議↓↓↓↓
涉事巴士行走北區路線，當時行至接近「欣盛苑」巴士站，有網民在社交平台發片分享當時情況，他指車內有一名大叔「係巴士睇片開到勁大聲」，之後巴士車長「行緊高速公路途中，突然停低架車，行過去鬧爆個阿叔」。
樓主分享的影片看到該名大聲播片的大叔，坐在下層第一層靠走廊位置，巴士車長大聲憤怒地向他說：「我歡迎投訴，你記低個車牌！」有其他乘客勸交：「細聲啲，細聲啲啦，熄咗機，去開車啦。」大叔仍不服：「依家都無聲......」巴士車長怒斥：「你好似好唔滿意咁喎！」大叔爭辯：「梗係啦，無端端畀你『拮』。」有乘客再勸交：「佢依家咪熄咗囉。」
巴士車長：你好似好唔滿意咁喎！ 大叔：梗係啦
這時司機喝令大叔不要舉手機拍攝：「你唔好影呀！」大叔說：「我無影呀。」車長警告他：「你依家騷擾到我揸車，我就開唔到車啦......你好似好唔滿意咁！......」乘客再勸交：「好好好，揸車揸車，大家都趕住時間。」大叔仍不服氣：「我熄咗機囉喎。」乘客即時勸阻大叔：「阿伯你唔好出聲啦。」
巴士車長怒氣難平：「你投訴啦，歡迎你去投訴，你依家去投訴，我依家唔開車啦，我索性唔開車啦，投唔投訴我都唔開車啦！」他又再指罵該大叔：「你好似好唔滿意我咁！」大叔又反駁：「梗係唔滿意啦......」車長即說：「得啦，得啦，咁樣你放心。」之後底頭打電話，相信為通知上司另調巴士接載乘客。
這時有乘客再勸交，巴士車長仍情緒激動，怒斥該大叔：「我已經擺埋一邊㗎啦，我同你講義，你好似好唔滿意咁！」有乘客代大叔道歉：「阿哥呀，對唔住啦，對唔住啦。」但大叔拒道歉：「咩對唔住啫......」有其他乘客即叫他「唔好出聲」。
巴士車長再度怒斥該大叔：「你好似好唔滿意咁！我同你講......你騷擾到我喎，你好似好唔滿意咁，你騷擾到我呀！」片中聽到乘客好言相勸，不斷安撫車長情緒，希望他繼續駕駛。
樓主：係群眾壓力下，明顯司機未可以休息一下
樓主交代後續指其後「好多人圍攻個阿叔叫佢收聲，然後請司機繼續開車」，「因為好多人都拜託司機快啲開車，係群眾壓力下，明顯見到司機未可以休息一下，（司機）情緒平復翻啲都答應肯開車。」
不過，樓主表示：「雖然最後個司機肯揸翻車，但見到佢情緒咁激動其實都好驚」，「驚影響對路面判斷同道路安全，但我好慶幸同多謝呢位司機最後可以維持專業，冇畀呢位阿叔影響，完成整趟旅程。」
不安？「見到個司機情緒高漲去開車、講自己揸唔到車」
他認為司機情緒激動下駕駛，令他感到不安：「唔好話巴士、小巴定的士，你自己係架車上面，見到個司機情緒高漲去開車、講自己揸唔到車，即使你知道佢做嘅嘢係啱，都會感到不安。」
網民：D人硬係唔記得馬場巴士單意外
帖文引發熱烈迴響，不少人諒解車長被阿叔大聲播片滋擾之苦，力撐他怒罵大叔之舉：「或者有d人唔知對聲音敏感既人，太嘈真係會令司機分心兼情緒高漲。」
有網民指司機位其實「好應聲」，大聲播片會影響司機駕駛：「司機鬧得好，但我都明白你驚既心情。」「唔好以為睇片開聲好小事，司機位係好應聲，係非常應聲。」
對於車長之後繼續駕車，引起議論，有網民認為車長實屬為難：「車長處理就話車長情緒激動，車長不處理就話車長不負責任。」有網民支持車長不開車：「司機有權唔開車」，「我一定唔開車，報警。」「D人硬係唔記得馬場巴士單意外。」
來源：yyte_23＠Threads
同場加映：九巴車長土瓜灣駕駛途中竟突落車購物 乘客直擊買一物疑健康出問題 九巴：正調查事件↓↓↓↓
