快餐店優惠券套現大法？港人自助下單突遭人強行掃會員優惠 再被要求現金 網民：下次見到一律彈開
發佈時間：17:48 2026-10-05 HKT
近年越來越多食肆引入自助點餐機，方便食客自行落單點餐，省卻於櫃枱排隊付款的時間。近日，有港人於連鎖快餐店使用自助點餐機時，突然有人「衝出黎係我張單scan佢個會員」，其後更代他按付款鍵。事主本以為是協助對方儲會員積分，豈料對方透過電話文字要求他支付其會員優惠券的$5差額現金，引起事主不滿。帖文引起網民熱議，有網民認為的確是事主佔了便宜，但也有人表示事主被強行「套現」：「下次見到一律彈開！」
港人快餐店自助下單遭強行Scan會員優惠 事後被對方要求支付現金
現時，不少食肆推出會員制度，只需透過消費儲分或達到指定消費次數即可以獲得優惠。近日，有港人於社交平台發文，憶述早前於連鎖快餐店排隊使用自助點餐機時，突然遇到一名啞人「衝出嚟喺我張單scan佢個會員」。一頭霧水的事主未知對方的動機，本以為對方是想先下單，惟對方又為她按下付款按鈕，事主見狀心想「當幫佢儲分就照畀啦」，於是繼續完成付款手續。
豈料事主完成付款後，對方透過手機顯示文字，向事主示意「畀返$5佢」。原來樓主的單據本為$57，因「會員」消費次數達標，所以能享有減$5優惠，最後埋單$52。事主當時拒絕付款，對方堅持苦纏，「死咬我唔放」。最終事主當場發火痛罵對方，「佢先唔纏住我」，更有感「被人老屈」，直言自己「$5我都唔會俾呀！」
網民建議：應找店員取消下單
帖文引起網民熱議，有人批評事主佔對方便宜，認為她令對方損失$5，「你用咗佢嗰$5，佢損失咗，你得益咗，而佢係啞根本無能力同你拗，所以係相反，係你屈佢」、「其實$5啫，無需要咁高調，無需要咁嬲，可能佢真係有需要」、「依家就咁睇你係攞咗人哋$5仲要話人乞兒（衣），你明知佢啞嘅唔幫佢都算，攞完人着數仲要上網唱佢？」。有網民解釋，使用自助點餐機時如有獎賞，付款前需確認使用才能到支付的步驟，質疑事主「唔會唔知自己個餐扣咗$5，人哋要你俾返$5你好乞衣，不過你唔係衰貪心，人哋係屈唔到你」。樓主則解釋使用$5優惠是由對方操作，「我俾錢前唔知佢意圖，攞$5呢個優惠係佢幫我撳」。
有網友補充，$5會員優惠需要每周惠顧3次才能享有，認為樓主雖獲$5折扣，但同時因被他人強行使用會員優惠，「實際上就蝕咗57分，收據上有佢八達通號碼，scan上1823佢開個case都得」。不過，有網民認為樓主不清楚對方意圖可直接取消購買，或如對方有意「套現」$5，可直接向樓主提出，「如你知佢掃會員就立即取消重買」、「如先『問』咗人哋可唔可以幫手『套現』嗰$5，我覺得冇問題，但依家係夾硬焗人要俾返佢，就係佢問題」、「佢$5都係夾實scan人哋張單儲㗎啦」、「叫職員過嚟幫你void單，順手投訴騷擾顧客，阻人正常落單」。
與此同時，有人質疑「$5」只是優惠券，並非「$5」現金，事實上對方沒有真正擁有$5現金流，「呢5蚊唔係啞人嘅現金，係優惠券，原則上是需要買飯先可以減錢，並唔係樓主拎走人現金流嘅5蚊」、「$5係快餐店比嘅優惠，並唔係實質可以全港使用$5」。
文:R
資料及圖片來源:Threads
延伸閱讀：茶餐廳搭檯慘遇狂咳唔捂嘴無賴？內地女使出「狠招」反擊 對方慌忙做1動作 網民爽爆：學到了
