新樓蚊型露台有咩用？網民分享極限空間活用法種植物/放雜物/打邊爐 1缺點遭批評：冇實際作用

更新時間：13:00 2026-08-23 HKT
發佈時間：13:00 2026-08-23 HKT

香港地寸金尺土，近年不少新盤為增加「實用面積」，紛紛增設空間狹小的露台或工作平台。近日，有網民在社交平台上發文，直言不解「新樓啲細工作平台究竟有咩用？」帖文引來大批網民討論，有戶主分享極限空間活用法，表示可以種植物、放置雜物，甚至打邊爐！惟不少網民因1大缺點狠批，直言「最憎呢啲咁嘅平台，冇實際作用。」即看下文了解詳情。

網民分享新樓蚊型露台空間活用法種植物/放雜物/打邊爐

近日，有網民在Threads發文，好奇「其實新樓啲細工作平台究竟有乜X嘢用？」遂發帖希望網民分享活用這空間的方法，「有冇高手可以分享下你點樣利用空間。」帖文引起網民熱議，不少人留言分享如何利用工作平台，其中最常見的是種植小型盆栽，有網民稱「我都係種下植物就算，其實真係冇咩用」、「我用嚟種花曬衫」，甚至有寵物主人笑稱是「狗狗睇景位」，「我隻狗用嚟睇景。」

有戶主則選擇將不常用的雜物、清掃工具等移至室外，「可以擺個防水箱，放下雜物」、「放地拖桶、雨傘、晾衫架、梯、購物車」、「放ikea防水室外櫃，深灰色嗰隻，放到好多嘢，不過個櫃入邊記得要放吸濕盒。」亦有網民「物盡其用」，擺放小型戶外吧枱、露營椅，待秋涼天氣時在戶外「飲酒、食串燒」，甚至「打邊爐」，「整個吧枱仔，無咁熱秋涼果陣可以出去飲酒食串燒」、「冬天可以擺張露營櫈chill下」、「種啲植物，坐喺度嘆咖啡都幾舒服」、「我曾經試過打邊爐。」

1缺點遭批評：冇實際作用

不過，不少人均批評這類「蚊型露台」毫無實際作用，不但極易積聚灰塵、夏天容易滋生蚊蟲外，一旦遇上暴雨或颱風天，更有機會積水甚至滲入室內，「夏天好多昆蟲，衫都唔敢晾，個露台真係冇用」、「但會好多塵，落雨地下勁污糟，要定期洗露台，冬天先會放出去晾衫」、「最憎呢啲咁嘅平台，落雨又有機會入水，又污糟又要清潔，冇實際作用」、「我開頭入嚟住仲諗住喺露台度晾衫，買咗晾衫架，跟住我發覺啲衫晾喺出邊一日，返嚟第二日已經有塵喺上面，我就冇再喺露台晾過衫，之後就荒廢咗。」

圖片及資料來源：Threads

文：Y