港男往舊同事居酒屋撐場 $2,900埋單疑被劏 發文大鬧：唔熟唔食！識人貴幾舊
發佈時間：10:05 2023-09-18
日前，有港男在網上發文分享自己光顧友人餐廳的經歷，以為「朝中有人好辦事」，卻吃得一肚火，埋單之時更感被劏，4人午餐足足花了$2,900，份量與收費不成正比，讓他深感不忿，直言前同事是「唔熟唔食」！
港男撐舊同事日本居酒屋 埋單$2,900 批性價比奇低
點擊圖輯即睇港男天價午餐餐點：
到朋友餐廳撐場，難免會期待所謂的「特別招待」，不過最近有港男在Facebook群組「飲食黑店大全 (全港食店質素/價錢/服務關注組)」發文怒轟，自己光顧朋友餐廳的中伏經歷。他指自己專程到舊同事開的居酒屋幫襯，同行兩位朋友更與店主有10多年交情，當中更有人專誠意由粉嶺搭車幫襯。誰知這頓飯，讓他們相當失望，更在帖文附上食物照片與單據，讓網民齊來評評理。
港男對於這頓午餐價錢尤為不滿，表示4個人埋單$2,900，每位$750，雖然吃日本菜不算貴，但食物份量、水準卻與價錢不符。「如果一早知呢個價食呢啲嘢，我哋一定唔會過去食！$750人頭食個Lunch，我諗應該超多選擇」。
事主於帖文中詳細講述自己的餐點，首先是兩碟前菜，分別是青瓜與蒜頭漬物，事主形容指「青瓜我遲咗嚟無食！蝕咗！」； 而當提到蒜頭漬時，即嘲諷份量奇小「之後先知粒粒皆辛苦，嗰碟嘢$40」。
來到主菜部份，分別有燒魚、拉麵、京都鴨川鴨胸及刺身。事主套餐拉麵僅提供兩碗，而且需要4個人分，結果「想飲多啖湯底都飲唔到」，配料方面「叉燒，我食咗半舊」、「和牛，我食咗1塊仔」。而燒魚可不是一條上，只有一塊疑似魚骹位置。
另外，京都鴨川鴨胸定價為$288，價錢高昂讓事主不禁指「我想問佢拿張貨單睇下咪真係京都鴨川貨」。最後刺身定價為$600兩款，事主吃了5塊，有池魚、北海道角魚、赤貝等。
吃到最後，事主指「甜品連一個雪糕糯米糍都冇，搞到我哋要自己去買個雞蛋仔做甜品，衰過食放題！」。最後事主忍不住爆發，直言「總括嚟講main course就係嗰一塊魚，係一塊唔係一條！ 加個兩碗拉麵 4 個人食，慘過做乞兒！」。
不過，最讓事主感到詫異拉麵轉牛骨湯，竟要多收他們$10，認為店主斤斤計較。
事後，事主愈想愈氣憤，致電詢問店主朋友，問道「點解可樂都請唔到」，結果店主指「日日都要點貨，報返條數上去」，讓事主不禁笑言「店主話自己係大股東，但連請一罐可樂我哋飲嘅權力都冇！我貪小便宜，可樂都要R（搲），我認」。文末，事主直認自己相當後悔，指「如果一早知，我會選擇去酒店食brunch，起碼唔會坐bar，枱咁貼住坐！今時今日咁樣做生意我真係祝你生意興隆」。
網民笑指朋友都劏「送比我都唔食！」
帖文一出後，立即引來網民熱議！不少網民看完照片後，紛紛留言嘲諷事主「有一班易昆水魚同事」、「送比我都唔食」；亦有不少網友集中評論餐廳供應的美食「就咁睇張單，其實冇乜邊幾樣價錢特別貴。唔知你係俾佢落order定乜 ，如果係自己單點 冇乜問題。如果佢幫你落，就好明顯係幫手清貨！」、咁嘅份量…唔算得乜野貴食材….算幾貴了」、「果舊咁嘅煙鴨胸$288」、「錢就比左，如果野又唔好食既話，真係火都黎，112蚊4權可樂，不如加錢飲sake」、「4罐可樂收$112, 睇嚟我真係飲唔起可樂」。另外不少網友關注事主與餐廳老闆的交情，認為「朋友嚟食嘢，大股東乜都冇送，嚟做乜！」、「朋友係用黎出賣架」、「一罐可樂都收$30就知黑店」、「大義滅親，十幾年朋友都加一」。
資料來源：Facebook群組「飲食黑店大全 (全港食店質素/價錢/服務關注組)」
延伸閱讀：內地客西貢食海鮮「被宰割」$21000？網民戥不值：唔怪得旅遊業每況愈下 店家嬲爆回應
