香港好多「支野」無法消化|曾智華

更新時間:06:00 2026-11-17 HKT
發佈時間:06:00 2026-11-17 HKT

坦白從寬,小弟雖然每周在此講投資,但其實識得幾多吖,故也是撞板多過食飯。對,一個人的腦力有限,但若願意虛心借力,咁又唔同,可以有集腋成裘效果。

近兩年,官方公布的經濟形勢,似乎大佳,但市民日日行街或晚上見證市面,卻是一副蕭條景象,究竟真相如何?前晚刻意搵幾十年縱橫金融地產老友L爺請教。

「碌Sir,政府報喜不報憂,舉世皆如此,角色需要也政治正確呀!你幾時見過侵侵話美國唔掂,打伊朗衰晒、油價爆升?故此,真相要自己尋找。其他唔講,講本城非住宅物業是道,簡直是處處炸彈,唔知點收科!如今,全港九有無數『支野』要搵買家,但買家何處尋?再落去,銀行必逼倉,如此,一線尾及中小型地產商會火燒連環船,可能出現不少公司壯烈犧牲。」

地產商用「支野」來形容一楝樓宇,如今資不抵債的物業,全香港皆是,銀行揸到一手都係,當然不會再放貸俾人買住宅以外物業,如此,買家賣家皆只能企喺度發呆。

最弊,美國利率高踞不下,而港元與美元掛鈎,冇得揀,唯有照跟。

不少地產商貪勝不知輸

坊間好多「支野」有十多年歷史,即在地產高峰期及零息時買入,曾經好景過,那時,最大鑊是不少地產商貪勝不知輸,見物業升值,立即加按班水再掃貨。波叔正是典型例子,雖征戰物業界幾十年,仍然被勝利沖昏頭腦,頂峰時,連經紀唔賺佣都喝住佢咪再買啦,但唔聽,結果……?

L爺表示:「如今香港有大量一線尾以下的地產集團,根本埋唔到尾,故此,小投資者切勿貪平買佢哋股票,分分鐘渣都冇。另外也要留意,勿買太多銀行股,因佢哋唔知孭咗幾多內房及香港的物業爛帳。」

L爺進一步指出,本來香港屬開放市場,物業買家可由四方八面而來。但因地緣政治關係,美國帶頭的西方國家,政策是「陰乾香港」,故處處阻截資金流入,碰啱中國亦水乾要猛追稅,如今,只得新加坡有錢入。

形勢就是如此,大家執生喇。

資深傳媒人 曾智華