冇個局敢答銀債利息問題｜曾智華
發佈時間：12:26 2026-09-28 HKT
上周本欄大字標題：誰「偷走了」銀債利息？真奇，如此簡單直接的問題，竟在小弟社交平台上獲得255,731次（執筆此刻）瀏覽，顯示，極受公眾關注。
公關負責人是否看不見？
更奇，如此受公眾關注的簡單問題，一周了，竟然冇人挺身給予官式答覆，究竟財經事務及庫務局及金管局的公關負責人，是否也看不見？又或是，呈上局長後，局長都唔知點答？喂喂，我都做過三十幾年公務員，這種反應，不太合理，相當不太尋常噃。
雖然官方唔敢答，但留言板則非常洶湧，當然絕大部分附和小弟，人人好奇——究竟幾千萬銀債利息，去咗邊？邊個袋咗？
事實，銀債出咗11年，簡單推算，凍結申請的款項，利息總共幾億，絕非細數。呢條數，去咗邊，若你透透明明公開講，只要合理，冇人會反對，總好過收收埋埋。11年喇，今次終於俾人大大聲問，仲唔交代？
有人組織合唱團開脫
我又觀察到，留言板中，有人組織合唱團去為有關方面開脫，但論據毫無邏輯，藉口包括：
（一）年年咁多IPO都係咁啦，hold住幾億到幾百億㖭，做咗幾十年，又唔見你出聲仗義執言？
我答：IPO乃純商業行為，大鱷汲水，散戶皆知，你情我願（但不等於我支持呢種欺負小股民的合謀行為）。銀債完全不同，乃政府一手策劃，即政府行為，一切應光明正大有根有據，全部公開。若果神神秘秘私私縮縮，當然會被納稅人查根問底。我從無反對，只要有理，中介人可分去銀債幾千萬利息，只想指出，此乃「公眾錢」，必須交代，為乜要引起大眾猜疑？
（二）金管局及銀行為銀債申請搞到「薪」水身汗，要行政費用㗎，邊可能有免費午餐㗎？
我答：邊個話金管局及銀行不應收行政費用？請勿偷換概念！銀債利息，部分去咗做行政費用，冇乜人會反對（只反對毫無需要地hold住過千億7日！），如今只抗議唔交代邊個攞咗幾多錢。再講一次，銀債由金管局發出，金管局乃公家機構，一切錢財運作，個個市民有權過問！
資深傳媒人 曾智華
相關文章：誰「偷走了」銀債利息｜曾智華
