港大醫學院院長劉澤星自嘲「唔聽話病人」甩腳趾跑半馬 術後重新學行
發佈時間：10:00 2026-10-08 HKT
「病人有病搵醫生，咁醫生有病呢？」香港大學李嘉誠醫學院院長、風濕科專科醫生劉澤星教授，接受TVB節目《醫生，你有病？》訪問時以病人身份現身說法，由跑馬拉松跑到心臟出事，到腳趾甩骹仍繼續跑，最終要入院做手術。這位「唔聽話病人」親述由醫生變病人的心路歷程，反思病痛如何令醫生找回同理心。
跑馬拉松廿幾年 頭暈無力發現心律不正
劉澤星教授首次跑馬拉松，原來並非為健康，而是為啖氣。「年輕啊，嗰時自己以為幾fit，覺得跑咪跑囉，冇可能唔得㗎。」他笑言第一次根本沒準備，最長只練過7公里，結果跑不完。「跑唔完之後就有個動力，同自己講：冇理由唔得嘅。」就是這份不服輸，令他跑足廿幾年。
跑了多年，有一次他突然感到無力、頭暈，猜測心臟出現問題，但他不敢告訴太太，一直拖延。直到最後覺得「唔可以唔睇」，一檢查就嚇親護士。「護士做完心電圖好驚，即刻話：『先生，唔該你入治療房瞓低，你唔好郁。』」他形容心電圖「好肉酸，望落好似就快死咁樣」，檢查發現心律不正，手術後回復正常。
跑步暈倒 揭患迷走神經性昏厥
兩年後重新起步，與兒子備戰馬拉松，卻跑到鬼門關。「跑跑下，突然間，嘭！就跌咗。」他完全不知發生何事，中間幾個鐘頭記憶模糊，只記得聽到兒子驚呼：「Daddy, are you OK?」跌倒時面部著地，鼻哥及多處裂傷。昏迷幾個鐘，多次轉院，最終送回瑪麗醫院。醒來後拿電話一看自己個樣，忍不住笑：「哇，原來咁嘅。」他自行診斷，相信是蹲低綁鞋帶時引發「迷走神經性昏厥」。
甩腳趾骹照跑半馬 關節移位入院做手術
除心臟問題，劉教授雙腳亦勞損嚴重，他自行確診退化性關節炎，更自己處方藥物，甚至自己喺膝頭打透明質酸。「我自己曾經試過都痛嘅，咁我自己咪拮枝針落去囉，自己搞掂佢。」他笑言與NBA球星勒邦占士同病相憐——因腳趾叉得太闊，其中一隻腳趾甩骹。「因為嗰個骹唔係最嚴重，亦都唔係經常痛。」他繼續返工，繼續跑，今年半馬更是帶傷「甩住腳趾跑」。
劉教授左腳拇趾外翻到變形，買鞋要買大一個碼、闊頭款。「呢個樣已經六、七年㗎喇，玩HYROX同半馬都係隻腳咁樣。」大拇趾長期頂住第二腳趾，導致移位甚至甩骹。太太及兒子多番勸他做手術，他卻以「懶、冇時間」為藉口拖延。直到連企多日都痛，照X光發現關節移位，才肯面對。
職業病發作翻睇手術片
手術當日，劉教授換上病人衫，仍不忘工作。「仲有兩個鐘頭先做手術，原來已經好多email喇。」他形容病房似酒店check in，形容感覺幾好。他選擇全身麻醉，坦言：「我都驚㗎嘛。」主診醫生笑言：「佢依家唔係院長，係病人，我都當佢係一個病人咁處理。」
術後，劉教授又痛又嘔，但麻醉藥一過，他急不及待問同事取手術相片，更翻看同類手術影片。「睇下究竟我琴日嘅經歷係咩囉。我發現我哋同事真係好叻，喺個窿仔嗰度可以做到咁多嘢。」採訪團隊笑他「有病」，是職業病。
術後重新學行 感同身受：醫生一句話影響深遠
術後要穿特製鞋，劉教授重新學行路，他試行幾步已出門口，被提醒行慢點、步幅小一點。他自嘲：「我可能輕視咗個手術。」原本打算翌日返工開Zoom會議，最終都要休息。物理治療師教他「上樓梯用好腳先，落樓梯用壞腳先」。出院後五日，他已經飛到澳洲公幹，獲安排傷殘人士房。
經歷兩次大病，劉教授感觸良多。「以前覺得有幾唔舒服，可能開始唔記得咗，做返病人嘅時候又記得返。」他認為醫生耐不耐病一下，企喺病人嗰邊感受，是好事。「醫生講一句嘢，影響都好緊要。我聽佢講：『呢幾個禮拜你咪整親佢，整親就真係曬咗心機。』覆診時醫生話：『你隻腳消腫得好快喎！』我覺得好開心。平時同病人講，未必覺得呢句嘢有咩影響，但其實病人聽咗醫生好簡單嘅一啲嘢，都可以記住。」劉教授以自身經歷寄語市民：「有病……企硬，唔好拖！」他提醒，及早求醫、聽從專業意見，才是對自己最好的照顧。
延伸閱讀：精神科醫生丁錫全天生讀寫障礙、口吃 憑驚人毅力考入中大醫科 網民揭20年前獲治癒抑鬱「救返我一命」
---
