林嘉緯·港超聯｜「香港大衛施華，西班牙林嘉緯」夢幻合體 林嘉緯指是難得的機會兼讚對方冇「揸流攤」
發佈時間：19:43 2026-11-07 HKT
港超聯今日（7日）上演夢幻合體，一直被球迷指踢法像大衛施華（David Silva）的林嘉緯，在至尊沙田對標準流浪一戰中與本尊一同上陣，並問到球迷一直用自己和施華相提並論到一同上陣，林嘉緯則指很享受可以和他練波和比賽，對自己和球隊亦是一次難得的經驗。
「香港大衛施華，西班牙林嘉緯」合體
林嘉緯指出今場球隊發揮很好和佔後，但可惜在領先後和控制局面的經驗不足導致被對手扳平因此較可惜。嘉緯今場以後備上陣，一直被球迷笑稱的「香港大衛施華，西班牙林嘉緯」歷史性地同場上陣，嘉緯對此表示：「當然好開心啦，因為施華都係我呢個年代其中一個最欣賞嘅球員。通常好多人都拉埋我同佢，即係成日講話好似近大家呢啲動作啊、踢法各方面。咁係興奮嘅，喺練波入面其實都有同佢有啲配合啊，都好享受可以係場上嘅一份子。」他也指：「雖然佢同我哋踢得一場啦，但係你見到佢落到去真係好用心想幫我哋去贏波，即係唔係話嚟到我好錫身啊，好似純粹表演咁。你見到佢真係喺個比賽入面後好投入喺呢件事度。我覺得對於我哋球會同我嚟講係一個好難得嘅經驗。」
嘉緯也表示大衛施華的加盟也激發起年輕球員的鬥心，也可以從他身上學到不少東西，而提到今次施華的加盟對球隊的幫助時嘉緯則坦言：「我覺得至少而家譬如球會個知名度，你見喺香港、喺世界也好，多咗好多人認識啦，呢方面一定係一樣正面嘅事啦。」同時他也補充：「但係你見到我哋其實唔係淨係話喺場外搞好多gimmick嘢，你見場內我哋即係開初表現唔好嘅時候，我哋都搵鄧達思、鷹取聖返嚟，即係喺針對性嘅位置去補強。其實我哋希望平衡成績同吸引力囉。」
球隊是升班馬需要時間去進步
季初沙田揭幕戰以3:1挫東方，但後來未嘗一勝，對此嘉緯則認為球隊表現最近有所回暖，亦證明球隊的方向是正確的，他也坦言球隊首場贏東方令球迷增加了不少期望，但同一時間沙田也只是一支升班馬，因此需要時間去進步：「因為我哋第一場贏咗東方，跟住之後「嘩，好似我哋可以挑戰傑志、理文」有呢種諗法喎可能。但係我哋要一步一步嚟，因為我哋係一隊第一年升班嘅升班馬，我哋以前喺最高水平嘅聯賽冇任何歷史。我覺得大家都需要啲空間同埋我哋要明白呢樣嘢，我哋一步一步嚟。」他也指球隊主帥新上任亦要時間磨合和認識班底。
記者/攝影：魏國謙、楊駿堯
