元朗YOHO MALLl美食廣場9月結業！網傳轉型由一連鎖集團接手網民反應兩極：好難食VS學生哥平價選擇

元朗YOHO MALL美食廣場9月結業！網傳由連鎖集團接手轉型網民反應兩極：好難食VS學生平價選擇

更新時間：17:21 2025-09-01 HKT
發佈時間：17:21 2025-09-01 HKT

元朗YOHO MALL美食廣場近日傳出將於9月結業的消息，有指該範圍將由一連鎖品牌接手經營並轉型成其他業務，引起一眾網民熱烈討論，有人認為美食廣場內的餐廳出品「又貴又難食」，迎來結業收場亦是無可避免，不過亦有人指其為附近學生的平價選擇，對區內少一個平價且適合久坐的用餐地點感可惜。

元朗YOHO MALL美食廣場9月結業！網傳轉型由一連鎖集團接手

位於YOHO MALL形點I的Foodeli美食廣場在2019年開業，佔地約9千呎，場內有約10間餐廳進駐，如Pepper Lunch、炑八、山城小麵、叉燒丼家、Bove等。美食廣場設有落地大玻璃，環境開揚光猛，而場內其中一個最大賣點就是設有「兒童用餐區」，設有多張圓枱矮凳仔，方便一家大小前往用餐。

近日有網民在Facebook群組「食在元朗」發文，指該美食廣場將於2025年9月結業，最後營業日為9月10日。而早於8月初，有網民稱美食廣場內有4至5間餐廳「關咗門」，稱「唔知係要大裝修定係執笠。」

據網上消息，該美食廣場的原址或將由連鎖健身品牌EFX24 Fitness接手，早前品牌曾在官方Instagram限時動態貼上Food Deli舖位的照片，並透露即將進駐YOHO MALL1，預計2026年第一季開幕。雖然未有正式公布具體地點，但已引起網民廣泛關注。

網民反應兩極：好難食VS學生哥平價選擇

對於結業消息，網民反應兩極，有人認為美食廣場內的餐廳出品「又貴又難食」，支持結業：「污糟邋遢，又唔好食」、「通風極差」、「啲嘢其實幾難食」、「終於執，個場通風勁差，成日都有陣臭味」

不過亦有人對此感可惜，「Bove格仔餅好好食」、「Food court都做唔住？」、「我嗰陣yoho返工，呢度係我嘅飯堂」、「雖然都只會幫襯兩間，但至少價錢相對低，咁之後咪又冇平嘢食」、「嘢食就不予置評，但幾鍾意佢有落地玻璃，可以好開揚咁望住出面食吓嘢，雖然冇乜咩景睇㗎啦，不過都幾舒服。」

亦有網民指出美食廣場是不少學生的平價選擇，惋惜失去一個平價且適合久坐的用餐地點，「繁忙時間好多人幫襯，尤其附近有4間中學、4間小學。無咗food court，附近嘅學生哥放飯又少咗好多選擇」、「呢度多位，食完嘢可以坐多陣，其他餐廳好難可以坐多陣」、「唔計好唔好食，冇咗附近唯一一個又平又坐得耐嘅地方係好大鑊…」

有網民則認為該舖位應轉型，建議可由大型百貨公司進駐：「開間馬莎 / city super / Aeon好過啦！」、「轉AEON超市，壽司郎，或Pop Mart專門店，咁就完美了。」、「開ikea啦」、「Donki 一票」、「開Daiso 12蚊店。」

YOHO MALL Foodeli美食廣場