一家三口叫2碗麵再要求免費加麵？天后拉麵店呻制度被「玩爛」老闆發話：以後會做最低消費
發佈時間：15:50 2025-08-25 HKT
許多拉麵店因為擔心客人食不飽，都會提供免費加麵的服務。近日，一間位於天后的拉麵店老闆在社交平台上發文，指最近有一家三口到店內用餐，僅叫了2碗麵卻要求免費加麵。老闆拒絕後雙方起爭論，最後老闆表示可以免費招待，對方卻堅持付款，「佢哋唔肯，話堅持俾錢，因為要放上網唱衰我哋」。經此一事，老闆聲明以後將會設有最低消費，即看下文了解詳情。
一家三口叫2碗麵再要求免費加麵？老闆發話：以後會做最低消費
近日，一間位於天后的拉麵店老闆在Threads上發文，指最近有一家三口到店內用餐，三人僅點了2碗麵，卻要求免費加麵。老闆隨即拒絕加麵請求，並表示「咁樣冇得免費加麵」。惟對方被拒後「着晒火」，不停與他爭論，「隔離有一台兩個人叫一碗麵，佢哋想加麵，個爸爸都問我點解人哋可以，我回覆佢，我都冇加俾佢。」最後為平息爭論，老闆指可以免費招待，但對方卻拒絕，「佢哋話堅持俾錢，因為要放上網唱衰我哋。」最後老闆只能無奈發話，指以後將會「白紙黑字寫明有最低消費啦。」
天后拉麵店呻制度被「玩爛」 老闆：唔好濫用我哋不計成本嘅初心
其實較早前，老闆就曾發文稱「終於都玩爛咗個制度」。老闆解釋，起初推行免費加麵是希望客人食得飽，加上生意難做，故希望所有客人都可以吃得「滿載而歸」，「免費加麵嘅初心都係想客人食得飽，同埋而家生意真係難做，有客人入嚟食已經感恩，所以冇諗過設最低消費。」但卻發現有客人因而浪費食物及濫用制度，「例如有部份客人兩位過嚟，兩位點一碗拉麵，然後加兩三次免費拉麵；亦都有四位客人點兩款拉麵，四人食兩碗麵然後再免費加四、五個拉麵。」再經過今次一事，老闆最終下定決心，設立最低消費，每座位必須點1碗麵才可以免費加麵。
網民留言：香港人有著數就拎盡
帖文引起網民熱議，有網民留言指「香港人最叻攞著數」、「真係唔好睇小，香港乞衣嘅程度」、「恭喜你終於發現香港最多嘅係乞衣，X客之都」、「雖然你係出自好心，不過你做得加麵呢樣嘢就應該預咗會咁，呢度係香港，香港人唔會執輸，有著數就拎盡。」
不少網民贊成設立最低消費，防止客人濫用，「本身免費加麵都有啲出奇， 啲人咪嗌兩個麵加到夠三個人食，一定有人咁做嘅」、「兩個人叫一碗麵唔夠食係基本嘅，但係你唔夠食係應該要俾錢叫多一碗而唔係叫加麵囉」、「做飲食嘅路過，規矩就係規矩，千祈唔好縱壞啲客人，之後佢哋就會覺得係必然㗎啦。」
圖片及資料來源：Threads@chingsuet_ramen
文：Y
延伸閱讀：九記牛腩又得罪人？馬天佑睇完「老闆剖白」片幫襯 因一杯凍檸茶慘遭「無敵厭惡」對待 網民：咩客都鬧好公道
