屯門聯邦皇宮酒樓突傳結業！店員親證消息 30年老字號落幕網民不捨︰由細食到大傳轉手1茶樓集團…

更新時間：12:54 2025-07-06 HKT
發佈時間：12:54 2025-07-06 HKT

繼旺角鴻星中菜、將軍澳四點金飯店突然結業後，再有街坊老字號酒樓傳出執笠消息！日前有網民在社交平台上發文，指位於屯門啟豐園的聯邦皇宮酒樓將於今日（7月6日）結業，呼籲街坊「要食就快手啲」，並有傳執笠後將會由另一茶樓集團取代，即睇內文結業詳情！

30年街坊老字號酒樓屯門啟豐園聯邦皇宮結業

日前有網民分別在不同的facebook專頁上發文，指位於屯門湖翠路啟豐園的聯邦皇宮酒樓要結業，惟執笠日子眾說紛紜，有指是昨天7月5日，亦有網民澄清是7月6日（今天）。有街坊則在留言質疑，酒樓有否出通告宣布，但有飲茶熟客就回應是「內幕消息」，而「我日日飲茶早就知道」。

店員親證結業消息網民不捨霓虹燈招牌

結業消息傳出後，大批街坊湧去留言，有人表示大感不捨，是「由細食到大」、「小時候住屯門碼頭幫襯過好多次」。特別是酒樓有一個極搶眼的霓虹燈招牌，有網民甚至指「網上睇到屯門聯邦皇宮做埋聽日，山長水遠去影低個霓虹招牌做紀念」，亦有茶客專程去飲早茶，「去歎最後一餐」。

不過亦有街坊表示酒樓開業30多年，質素每況愈下，「啲點心鹹到死，又成日有味，唔新鮮，真係唔掂」、「食物質素同招呼都差，唔執都難」，以及「侍應掛住吹水，冇人招呼」。帖文中亦有茶樓熟客「爆料」，指酒樓「晚市得3千蚊營業額」，而隨後將由另一茶樓集團茶皇殿接手，而「有部份人會請返」。《星島頭條》記者就此事致電屯門聯邦皇宮酒樓查問，獲店員回覆指酒樓的確是「做到今日」，但就沒有回覆結業後會否有另一酒樓接手。

聯邦酒樓集團逾50年歷史現僅剩兩分店

聯邦酒樓集團曾經是香港數一數二的大型中式飲食集團，於1972年創立，當年原名為金輪酒樓，後於1976年開設國賓大酒樓，即油麻地聯邦皇宮大酒樓的前身。直至1980年，集團於深水埗青山道開設了第一間以「聯邦」為名的聯邦大酒樓，隨後不斷擴充，包括有聯邦皇宮、聯邦金閣、東薈軒海鮮酒家、金滬庭京川滬菜館、泰棧泰國料理、潮客及月滿坊等。2014年更斥資過千萬於啟德郵輪碼頭開設聯邦郵輪宴會中心，後相繼結業，買少見少，現只剩低鑽石山荷里活廣場及北角港運城聯盛宴兩間店。