陳豪想去啟德開金口洗污名 贏偶像羅嘉良讚賞開心過攞獎

更新時間:20:45 2026-11-22 HKT
發佈時間:20:45 2026-11-22 HKT

陳豪今日(22日)到沙田馬場出席活動,提到他主演的劇集《玫瑰戰爭》熱播,問是否有人叫他做「生哥」?他笑言有。對於羅嘉良表示也有收看,讚他演得好,他即開心地反問︰「真係呀?」稱得到偶像稱讚比攞獎更好,指台慶當晚羅嘉良無跟他說,問可能怕他囂張?他即說:「係呀,我會嘅!係開心嘅,成齣劇熱度都幾好,多人睇。同埋追看性、觀眾鍾意程度、大家討論度,都比意外中更好,大家投入睇劇嗰樣嘢,我覺得對而家電視業係好事。」

陳豪被讚皺紋有戲

對於網民讚他連皺紋都有戲,陳豪笑說:「不嬲都有,坦白講,當我哋專注喺演戲嗰陣,我哋乜嘢都會拋開,你話點樣衰,已經全部都拋開,冇理嗰啲嘢。(好耐冇做過咁衰嘅角色?)少啲,好耐冇做過野獸,(喺屋企做?)唔得,我屋企咁多小朋友。(間房做?)I like it!好壞,我鍾意呀!大家對野獸嘅理解都唔一樣。」問他角色最後下場被割喉而死,是否難忘?他指不覺得是演戲:「我覺得自己就係生哥,生哥喺我理解之下係應該變成咁,天生就係野獸。好多人一開頭想幫我呢個角色講好説話,我成日都話其實唔需要,唔使幫佢講,壞人就係壞人,我都冇乜所謂。做演員就係咁,有時做好人,有時做壞人,乜都試。」至於子女有無看劇?他指沒有,他們早起床所以很早睡覺,又指小朋友知道父母是做演員,間中看一看也可以,但不敢讓他們看太多。

陳豪扔爆網球拍

陳豪續說,平日教小朋友,很少發惡,認為這不是正確的教導方法,「我最注重小朋友專注力。」當仔女心散講又唔聽,就會以嚴厲方式讓他們專心。陳豪坦言自己脾氣大,尤其是在打網球時會扔球拍,打爛了約十塊:「我EQ高,就算拍劇拍得幾辛苦,好少發脾氣。」提到許濤在台慶宣布將開拍5齣劇,陳豪透露拍其中一套時裝劇。至於來年在啟德主場館的Show,他指聽到後,「我嘅歌藝蠢蠢欲動!」提到他上次「墜機」(他登台唱《歲月如歌》時走音,網民戲稱像飛機失事「墜機」 )後還未起飛,陳豪說:「公司講咗好多嘢,等佢哋安排,我冇乜所謂,(要你唱歌OK ?)大家咁想聽,買埋飛,我冇得唔唱啦係咪?(聽你起飛!)我會唱返架飛機飛返上去!」