陳蕾叱咤「我最喜愛」五強斷纜反鬆口氣 屢遭MC、洪嘉豪整蠱要檢討

更新時間:15:45 2026-11-22 HKT
發佈時間:15:45 2026-11-22 HKT

陳蕾與周殷廷(YT)今日(22日)到沙田馬場擔任活動開幕表演嘉賓,YT演出時走落台唱之餘,更走近馬迷握手,而他唱《三生有幸》前他表示若有馬的話,也會改這個名字。陳蕾受訪時指,不太常看賽馬,所以更珍惜來參加活動的機會,又指自己也有點抽奬運,試過在公司晚宴中抽到黑膠機,但賽馬自己就不敢亂畀貼士給別人,自己也有幸運數字,就是三的倍數:「即係可能3、6、9、12呢啲,我都係唔知點解特別有感覺,所以如果我要盲買嘅話,我而家見到個電視有12號咧,我就會想支持佢,係冇理由嘅。」至於創作時是否也想放入數字?她笑指在節奏上也想砌到三的倍數,也考慮日後可以做一首數字歌。

陳蕾孖MC江門跨年

陳蕾稍後同MC(張天賦)、洪嘉豪演出江門跨年騷,她笑言好像無試過與MC、洪嘉豪一起跨年,所以好期待,而在跨年Show又見到兩人有無見到厭?她謂每次都好珍惜和開心,所以也會跟兩人自拍,但每次拍完都忘記上傳相片到網上,又指兩人經常整蠱自己:「停唔到落嚟,可能我有啲咁嘅體質令佢哋好想整蠱我,我又唔算發脾氣,會好䒐䒏,唔知佢哋係咪見到我好䒐䒏就好開心。」

陳蕾鬧洪嘉豪「小學雞」

陳蕾大爆之前與洪嘉豪看BIGBANG演唱會,他也會做出左邊拍她膊頭,但人就出現在右邊那些小學雞行為:「其實自己唔應該畀反應,諗諗吓兩個都三字頭嘅,仲係鍾意玩呢啲嘢……都難得,希望佢哋繼續保持呢份童真。」又指,被發現每年在叱咤記招上都會被整蠱而打人,上年打MC,今年打魏浚笙,「嗰個情緒反射就係好想打佢哋,我覺得係我問題。即係如果個個都係咁對我,咁係我要檢討。」

陳蕾叱咤「我最喜愛」八強止步

陳蕾在《2026年度叱咤樂壇流行榜頒獎典禮》「叱咤樂壇我最喜愛的女歌手」八強止步,問是否失望?她表示看到十二強名單,覺得今年好困難;看到十強的時候也有點緊張,抱代表公司的心態,想爭取更好的名次:「我又冇去太強求,係個心默默地希望,但又冇做啲咩咁樣。另一方面覺得歌迷已經好努力,為咗我可能都做好多嘢,我亦都唔想大家太大壓力。我都希望如果啲嘢係嚟嘅,就嚟得再自然啲,好過太大壓力。」

陳蕾有運開口中

提到她今年中斷過往數年打入五強的紀錄,陳蕾笑說:「斷一斷可鬆一口氣,下年唔使太大壓力,如果今年唔斷,我下年又繼續緊張心情。我覺得Dear Jane好勁,連續十三年入五強,大家對佢哋嘅喜愛程度持續咗十三年,係香港市民心目中一個好高嘅地位。」問下年是否會更努力?她指會在音樂方面努力,令樂迷發自內心去投她票,這樣才是最好。另外,訪問完成數分鐘之後,陳蕾所說的6號、12號竟真的在第一場中跑入了三甲。