Edan回應港版《悠長假期》海報寫錯字 自愧不如木村拓哉『無得比』 入圍叱吒10強心態隨緣：睇好自己拎唔到
發佈時間：19:45 2026-11-14 HKT
MIRROR成員呂爵安（Edan）今日（14日）出席《Edan Lui"e to E"LIVE 2025(Blu-ray)簽唱會，談到MIRROR於12月舉行演唱會，他表示已「閉關」，小組部份排練過一次，但大家不止一個小組演出，現時籌備中。談到他會否騷肌演出，他表示最多只會著背心。
呂爵安事前不知邱士縉穿泳衣
提到MIRROR成員邱士縉（Stanley）與李炘頤上月在峇里舉行浪漫婚禮，其中新郎Stanley穿上火紅高衩泳衣接新娘的照片流出，與一班兄弟玩得盡興。Edan笑言一班兄弟穿上的「孖煙通」也印住Stanley大頭樣，即場接受挑戰，但事前不知有這個環節，不過為了兄弟可以沒底線。談到Stanley穿著紅色高衩泳裝，他笑說：「梗係『索』啦！身材好，但梗係阿嫂好過佢啦！」
呂爵安會否出席叱吒待公司安排
對於MIRROR會否出席「叱吒樂壇頒獎典禮」，Edan表示有待公司安排。談到他成功晉身 「叱咤樂壇我最喜愛的男歌手」10強，Edan表示多謝大家投票，但覺得一年一度《叱吒樂壇頒獎典禮》好似一個party跟大家見面一齊玩。談到可有信心獲獎，他笑說：「梗係無啦！（睇好邊個得獎？）我睇好自己拎唔到。」至於MIRROR晉身十強「我最喜愛的組合」，Edan指對獎項隨緣，那一位得獎也好，都是為喜愛的組合出一分力，總之有人投票已經很感恩。
呂爵安恨同木村見面
另外，談到 Edan 與李佳芯主演的港版《悠長假期》推出首條預告及海報，被眼利網民發現海報中「期」字的「月」部多了一劃變成三橫，引起網民批評製作組粗心大意。 Edan說：「如果唔係人哋發現，我都發現唔到嘅，但網民真係好犀利、好細心！可能大家好耐冇寫過中文字，反而會寫錯字，我諗公司知道下次會小心啲，我都唔知邊個部門，總之呢單嘢唔係我跟開啦！」提到主演港版《悠長假期》宣傳片推出後，Edan造型獲外間讚賞。他笑說：「大家OK，我就OK啦！（可會擔心再受到批評？）我諗實會㗎喇！當接拍呢部劇時候都知道呢部係神劇，套劇喺大家心目中有份量，同埋喺嗰個年代，對我嚟講好珍貴嘅日劇。當接拍嗰時都知道會比較，但係冇得比，因為對方係木村拓哉，係世界級男神，自問絕對唔係。作為一個演員知道一套神劇冇理由唔去嘗試，我覺得心態去演好角色，跟木村前輩無得相比，所以沒有任何想去抄襲佢。雖然好多人鍾意原著，如果我哋翻拍呢樣嘢，令大家睇返原著都係一件好事。本身冇睇原著嘅人，就算睇完港版唔鍾意去睇日版，對呢部劇IP或想去表達嘅訊息都係一件好事。」談到該劇快將播映，可有壓力？他笑言沒有，已經完成拍攝，希望盡好本份演好角色。提到木村拓哉出道35年首度在台舉行個唱，問到可想見到他本尊？Edan笑說：「梗係想啦！最好可以嚟香港宣傳。」最近參演新戲的Edan，透露拍攝了一、兩星期，有待完成MIRROR演唱會後再繼續拍攝。
