東張西望丨74歲陳婆婆被氹逾11萬購800樽保健品日服400粒膠囊嚴重腹瀉網民痛斥等同謀殺

更新時間：12:00 2026-11-13 HKT
發佈時間：11:53 2026-11-13 HKT

TVB資訊節目《東張西望》昨晚（12日）跟進一宗令人震驚的投訴！一名74歲、無「三高」的獨居陳婆婆，竟然在短短兩個月於大窩口一間保健產品店，以11.6萬港元，狂購800多樽各式保健品，更誇張的是，店員竟指示婆婆「每日食4次，每次食5款，每款食20粒」，意即一日要吞下高達400粒膠囊！

陳婆婆日服400粒膠囊出現嚴重腹瀉症狀

據悉，店員向陳婆婆推介的5款產品包括排毒、壯骨、降三高、護肝及一款名為「Slim」的纖體減肥產品。陳婆婆本身身形瘦削，根本毋須減肥，亦無三高問題，但店員卻胡謅這能「清除體內毒素」，包裝上明明寫著一日最多服用4粒，店員卻教唆陳婆婆服用超出建議劑量達20倍的份量，當陳婆婆服用後出現嚴重腹瀉、一日大便十多次的症狀。

由於一次要吞100粒膠囊實在難以下嚥，該店的黃姓女店員竟然教導陳婆婆一招匪夷所思的「秘方」：將100粒膠囊倒進水杯中，加入70多度的熱水蓋好「浸泡10分鐘」，攪拌成一杯深褐色的濃稠液體，然後像飲茶般分多次飲用。節目組邀請陳婆婆即場示範，只見整杯水在膠囊溶解後呈深褐色、充滿膠質與未溶解的膠囊外殼，極其噁心，陳婆無奈表示：「好難飲，要飲好多次，飲完又抖下先再飲……」陳婆婆在訪問上表示兩個月內已經食了250樽，她坦言食完感到暈眩吐瀉：「食嗰啲搞到我暈佗佗......一日屙十幾次，一急就去。」陳婆婆曾向店員反映吐瀉問題，店員只答：「有大便就好，清咗啲毒。」談到堅持食的原因，她無奈嘆：「啲藥咁貴，食唔晒嘥咗。」

陳婆婆女兒得悉事件後亦曾探該店，店員向她展示客人名單卡片，陳婆婆女兒擔心有其他老人家信以為真同樣「中伏」：「其實好多婆婆都好似我阿媽咁買咗咁多，以前sell人都叫有啲節制，而家好似走火入魔，個個都想身體健康，但係唔可以喺呢個位，為咗sell多啲、賺多啲錢咁樣去害人。」隨後《東張》團隊到該店「放蛇」，店員劉先生稱：「保健產品唔使睇包裝食，因身形而異，要有效就要密密食，呢個係鹼性食物，唔係化學成份，多食冇問題。」劉先生又聲稱：「我冇病，一餐食45粒。」先生搬出黃姓店員為例，直指連癌症都醫好：「Cancer、高危疾病全部食好咗。一位黃女士、同事，我哋經理嚟，一餐食50粒，半年後做手術，一Check，癌細胞指數去咗安全水平，唔需要切除。跟住返轉頭攬住我同事喊，好感激。」隨後黃姓店員剛好返到店，她再落力SELL：「你好彩遇到我哋，你真係有咁嘅福氣呀！」她指產品醫好很多人，她謂：「醫管局都唔畀我哋講。」兩人強調產品有正貨正印，全部做了臨床測試。

網民稱仲毒過毒死戚家13口嗰煲湯

節目曝光後，在網上惹來不少爭議，有人說：「睇到條片你會諗起咩？各位呢度一煲糖水一斤砒霜倒晒落去之後，嘩.....」、「睇到好嬲，4粒都嫌多，而家成個400粒。」、「好嬲～勁無良，婆婆應該去做身體檢查。」、「成百粒點食得落？」、「仲毒過毒死戚家13口嗰煲湯。」、「好難過，咁樣呃老人家，仲叫佢要食咁多粒，令佢唔好受，睇到心都實埋。」、「同間接謀殺有咩分別？呢啲人究竟可以冇人性到咩程度？真係唔驚有報應？睇到好X嬲。」