鄧麗欣赴夏威夷電影節獲當地港人力撐 恨到夏威夷開騷望順便遊覽
發佈時間：20:45 2026-11-02 HKT
鄧麗欣（Stephy）獲香港駐三藩市經濟貿易辦事處（HKETO）邀請，赴美出席「夏威夷國際電影節」（HIFF 2026），Stephy攜主演的代表作《金都》與即將在港上映的《大分瓶》亮相，並參與電影放映、香港之夜及專場座談會，與當地影迷見面互動，同場還有何超儀與陳子聰攜同新作《拾荒法師》團隊，一同宣揚香港電影文化。
鄧麗欣兩場放映反應熱烈
夏威夷的影迷十分熱情，兩場電影放映會反應熱烈，Stephy之後更跟他們逐一合照簽名，當晚現場觀眾更有幸成為全球首批聽眾，搶先欣賞由Stephy親自填詞並主唱的《大分瓶》主題曲《無二分》。Stephy坦言首播時也很緊張，幸好觀眾反應熱烈，紛紛盛讚歌詞真摯動人、歌聲細膩，Stephy大為感動。
鄧麗欣解釋《已經離我太遠》MV非《金都》續集
Stephy說：「真係好開心！喺電影節中播放《金都》，呢一部好多年前嘅作品，但今次都有一個spotlight可以介紹畀大家，最搞笑嘅係有觀眾觀賞完電影《金都》後，以為我嘅新歌《已經離我太遠》MV係阿芳（Stephy電影中角色）20年後的續集，我都有解釋返並唔係嘅，哈哈……見到兩套電影放映後大家好都熱情，都好多嘢同我哋分享，最驚喜嘅係好多移居當地嘅香港人都嚟到支持我，大家都好熱情同我傾偈，原來佢哋都好留意我嘅嘢，知我啱啱出咗碟，佢哋都同我講希望可以有多啲香港電影喺夏威夷上映，同時都要多謝大會同埋HKETO嘅邀請，見到大家都好鍾意香港電影、對香港電影嘅熱情，真係好感動，希望可以繼續帶多啲香港電影去唔同嘅電影節，大家繼續支持香港電影！」
鄧麗欣行程密密麻麻仍感受熱情
這次是Stephy第一次到夏威夷，由於每天行程也編排得密密麻麻，所以未有時間去享受陽光與海灘，但她依然感受到當地人的熱情，直言之後有機會一定會再來，她說：「今次係5日4夜嘅行程，本身以為天氣唔係幾好，第一日到埗有少少雨，都有啲失望，但係第二日就非常之好天，好靚嘅藍天白雲，真係感受到夏威夷嘅靚，雖然每日都有行程，冇乜點樣出去玩同感受吓大自然，但都有爭取咗少少時間去行吓街，去沙灘望吓，所以都開心嘅。好記得喺座談會後有朋友問我會唔會去夏威夷開演唱會，我嗰刻都有諗，今次對夏威夷嘅感覺真係好好，但冇咩時間去玩，如果真係有機會去開騷就可以順便去遊覽，都幾開心喎！希望有朝一日會喺當地有音樂嘅活動！今次旅程真係非常開心、好溫暖！」
