Bob林盛斌力撐18歲大女林霏兒無視負評霸氣堅拒「溫室育兒」：呢個唔係我嘅家教

更新時間：20:00 2026-10-02 HKT
發佈時間：20:00 2026-10-02 HKT

有「娛圈多仔公」之稱的Bob林盛斌與太太黃乙頤（Pearl）育有三名女兒林霏兒（Faye）、林熹兒（Haye）、林機兒（Kaye）以及孻仔林道申（Jaye），瓣數多多的林盛斌身兼主持、司儀、演員等工作，又是娛樂製作公司老闆，吸金力強，傳擁10億身家。為家人有好生活，租住在九龍塘的豪宅，一家六口生活得很開心。

Bob林盛斌讚女兒成熟面對

Bob林盛斌一家向來都網民焦點，尤其18歲大女林霏兒充滿個性的性感打扮，不時引來網民關注，但她一放懶理，繼續大方展示豐滿身材。Bob林盛斌曾希望網民高抬貴手：「小朋友唔係呢個圈嘅人嚟，希望大家能夠俾一啲空間佢哋，希望大家可以將焦點放返喺我身上。」日前Bob林盛斌在陳敏之的節目《Chi Chat》上表示：「我好開心佢好作成熟處理，佢唔係扮，係真係好正面去睇。」

Bob林盛斌拒絕收埋女兒不許見人

在節目上，Bob林盛斌表示多年前女兒開始玩 Social Media的時候，已經一早幫佢打「預防針」：「我同佢哋講：『霏霏、希希、Kiki 邊個都好，真係有機會有人會特登入你個 IG/FB 寫衰你。因為佢哋可能好鍾意爸爸，或者好憎爸爸，所以先會咁對你，你哋要有心理準備。』點知真係有人走入去留言，而佢嘅回應真係好好，我覺得呢個女真係大個喇！最搞笑嘅係，上一次兩姊妹出席完活動畀網民批評，我見到二家姐問佢有冇事，點知佢話『冇事呀，都唔係講我，佢哋講大家姐咋嘛！』」咁我再大家姐講，點知佢都同我講：『OK 呀，冇嘢，唔使理佢哋。』佢哋心臟好強大。」談到網民對大女的評價，Bob林盛斌表示曾有網民叮囑他不要再允許女兒出席公開場合：「我就覺得好奇怪，點解會咁嘅？點解會咁諗嘢嘅呢？我唔覺得做父母所謂嘅『保護』，係要收埋個女唔畀佢見人，或者唔帶佢出席呢啲場合。因為佢總有一日要見人㗎嘛，永遠都有啲場合，先唔好講公唔公開，佢自己都要出去面對其他人。原來保護佢就係要收埋佢、唔畀人見，或者等佢唔好接觸外界咁多？I don't think so！我唔覺得係，我覺得最大嘅保護，做父母嘅應該係要令到小朋友內心強大、勇敢同有自信，建立好自尊心，識得點樣去面對人，有嗰份勇氣。我覺得應該係咁樣囉。」

Bob林盛斌指大女DSE英語科考獲高分

Bob林盛斌續說：「如果可以嘅話，無論係我潛移默化、我教導又好，定係我身教都好，都要話畀佢聽，我哋應該點樣去面對，對住呢啲攻擊、呢啲流言蜚語，或者呢啲令到你唔開心嘅人，我哋應該用咩心態去面對。如果佢真係學識咗，變得越嚟越強大，有強大嘅內心、勇氣、自信、自尊心，可以建立到呢啲嘢嘅話，我覺得咁樣先至係最大嘅保護。而唔係收埋佢，叫佢匿喺屋企唔好見咁多出面嘅人就當冇事，呢個對唔住，呢個唔係我嘅家教。可能你哋屋企會咁做，我唔評論，我尊重。但你唔需要話我聽我應該點樣做。我自己都係四個小朋友嘅爸爸，我都有做得唔好嘅地方，我有做得需要再反省檢討嘅地方，但有啲價值觀，我覺得我哋屋企、姓林嘅呢一家，應該係咁就係咁。」林霏兒早前透露入讀香港演藝學院，不少網民都好奇她將來會否入行，為此，Bob林盛斌說：「佢係咪想入呢行，我暫時就未覺得。不過佢而家喺演藝學院讀緊 diploma（文憑），之後佢會升讀英語音樂劇嘅Degree，即係嗰啲唱嘅音樂劇，我都唔知係咪莎士比亞，總之就係嗰一類啦，《孤星淚》嗰啲，佢嘅英文係好，DSE 好高分㗎，唔知係一粒星定兩粒星、星星嗰啲啦。」