陳庭欣打匹克球遇航空公司CEO 阿Bob帶隊「拜狐仙」催姻緣 Toby爆揀偶條件：三觀要契合

更新時間：19:00 2026-09-21 HKT
發佈時間：19:00 2026-09-21 HKT

現年39歲的2010年港姐冠軍陳庭欣，去年底正式承認與拍拖8年的富商楊振源分手。回復單身後的她搬離九肚山豪宅，但生活依然充實精彩，除了全副精神寄託在工作及家中愛寵身上，更瘋狂迷上新興運動「匹克球」。日前陳庭欣大方剖白分手後的心路歷程，坦言毛孩是她最大的精神支柱，但否認自己是溺愛的「寵物奴隸」：「我唔會係嗰啲好瘋狂嘅主人，去到邊都要帶住、又要手推車推佢哋，反而係要教好佢哋同自己，互相陪伴。」她透露在心情跌入谷底時，更靠匹克球忘憂走過情傷：「我試過最唔開心嗰兩日，連續打咗八個鐘Pickleball！令到我發現，原來生活唔係淨係得工作同愛情，仲有運動同興趣去豐富自己。」

陳庭欣波友非富則貴

寄情球場的陳庭欣不僅球技大躍進，更擴闊了社交圈子，結識來自各行各業的朋友，她笑言球場上人人平等、放下階級觀念，有次朋友帶了一位新波友加入，打完波後眾人坐低飲茶，對方聊起航空話題，毫不知情的陳庭欣竟單純地問對方：「你係做邊個崗位㗎？」對方隨即淡定回答：「CEO。」陳庭欣笑言自己當場反應不及：「我嗰陣仲喺度諗：『CEO係咩部門呢？負責飛機餐㗎？』個腦load咗幾秒先驚醒：咦！CEO咪即係最大嗰個！隔離個關楚耀笑到耷低頭，好彩我即刻死撐話下星期去北京都搭佢嗰間航空公司，服務好好呀，先成功帶過！」

陳庭欣指阿Bob教路拜狐仙

陳庭欣直言打波時只顧鑽研球技，完全沒有桃花，當中「金牌媒人」林盛斌（Bob）更極為緊張，陳庭欣大爆阿Bob私底下多次催促她出外交際：「Bob爺就算好忙，都好緊張我，成日發自內心鬧我：『你唔好成日顧住打波啦！分啲時間同人食飯啦！』佢真係有介紹過男士畀我食飯認識，但一切隨緣。」除了牽紅線做媒，阿Bob更帶她去「拜狐仙」求姻緣及事業人緣，陳庭欣直言過程相當新奇有趣：「我本身冇宗教信仰，但Bob爺話當認識下新嘢囉，咪抱住開放態度去試。嗰陣要喺張紙度寫八字、寫擇偶條件，同埋祈求多啲觀眾緣、多啲有錢粉絲，好似《中年好聲音》嗰啲粉絲咁有財力，諗返都覺得好好笑！」

陳庭欣稱喜歡運動型男士

至於目前的感情狀態，陳庭欣坦言十分享受單身的自由與輕鬆：「以前段感情太長，依家轉咗新環境，打波打到凌晨兩點都唔使同人交代，連我老竇都管我唔到！」步入輕熟女階段，屋企人雖未有催婚，但身邊不少閨蜜紛紛籌備「雪卵」，令她亦大感心動：「有朋友話年尾去台灣或者泰國做，仲有『二人同行優惠』問我去唔去，我都有叫佢哋畀資料我睇，當係為自己買個保障同多個選擇，到時生唔生都由自己決定。」談到未來的對象，陳庭欣直言外在身家並非首要條件，男方必須熱愛運動：「我希望佢識打Pickleball，偏向陽光型！不過最緊要都係兩個人嘅『三觀』要契合，諗法一致先可以行得長遠。」