蘇永康：送鑽石不如送學校！ 捐建5間內地小學 以父母太太命名丨獨家
發佈時間：22:15 2026-08-25 HKT
曾擔任兩年雁心會「愛心大使」的蘇永康與應屆「榮譽會長」太太馮翠珊（Anita），日前出席「雁心會樂幼基金愛心傳希望慈善晚宴」，同場還有仁清美敘應屆會長程瑤和丈夫朱仲賢。原來蘇永康一直有透過這個慈善機構，低調捐款資助興建了5間內地小學，並分別以父母及太太的名字命名，為善不甘後人的精神令人佩服！ 文：林朗勞 圖：羅安強
多年來雁心會已資助山區兒童興建118間希望小學，並透露蘇永康低調資助了5間湖南小學，去年更曾帶同兒子到湖南探訪。蘇永康受訪時表示：「2005年我同雁心會第一次上湖南，就開始咗我對國家認識，今年4月份又返上去，同時呢兩年去都帶埋個仔去，我同佢講，睇到國家發展好開心。20年前同依家完全係兩個樣，雖然『希望工程』停止咗，但其實係好事，因為唔再需要幫助。」他表示雖然已不需要捐助小學，但仍可以持續幫助在學學生的生活所需。
帶埋兒子探訪湖南山區
蘇永康太太Anita表示，帶同小朋友到湖南探訪是十分有教育意義的事，可教導兒子珍惜現在擁有的一切外，亦讓他學會身體力行，「我覺得對佢嚟講可以見識到好多嘢，好似第一次返內地，見到內地學校同我讀嘅學校有分別。」Anita又分享去年借辦生日會的機會做慈善，來賓將購買禮物的錢化做善款捐贈。蘇永康共捐助了5間內地小學，其中一間小學正是以太太馮翠珊命名，他說：「2014年結婚嘅時候，送俾佢嘅結婚禮物就係一間學校！」至於為甚麼會用「一間小學」當作結婚禮物？他回答：「識佢冇幾耐嘅時候，佢就已經知我做緊（慈善）。當然我可以用嗰個價值買一粒鑽石或者一架車都得，但係呢啲嘢會過，意義遠不及一間學校，學校開咗10幾年，都教咗超過1000名學生。我覺得佢（太太）會開心！」太太Anita也補充，去年曾與學校開過一個Zoom：「想了解佢哋需要咩幫助，其實佢哋需要嘅好簡單，佢哋淨係想要一個籃球架同籃球，原來佢哋有操場但係冇籃球架，要求好簡單。」
捐20萬元助升學
至於當晚典禮上，蘇永康也捐贈了20萬元，坦言以微薄之力幫助升讀大學的學生。出錢又出力的蘇永康更在晚宴上獻唱了《男人不該讓女人流淚》和《不想獨自快樂》兩首歌曲，令全場來賓都聽到如癡如醉。最後，蘇永康也寄語來訪的10位內地學生：「幫助人從來不分有沒有錢，叔叔從來都不是很有錢，捐5%或是10%幫助身邊的人就好。」
