中年好聲音4丨周國豐衰多口「冇凹到個台」焫著肥媽 被轟肥係無罪：死你就去啦
發佈時間：22:30 2026-08-09 HKT
TVB唱選秀節目《中年好聲音4》今晚（9日）播出「10強累積排名分」第四回合「改編歌之夜」，今集除有譚耀文做嘉賓評審外，DJ梁繼璋及范振鋒擔任知音人，十強選手各出奇謀，將觀眾耳熟能詳的經典旋律重新改編，試圖帶給大家全新感動 。今晚的評審肥媽（Maria Cordero）與周國豐之間的互動火藥味極濃，肥媽更在節目中兩度質疑周國豐針對選手的身形，引來全場關注。
蔡宓婕服飾成焦點
蔡宓婕今晚在比賽上演繹靜婷的〈我的心裡沒有他〉，之後由周國豐、肥媽等評審陸續給予建議。正當肥媽指蔡宓婕的服飾影響演出時，周國豐突然加把口稱：「我頭先都好擔心佢單腳，好危險，如果PK（跌倒）咗點算呢？」肥媽認為跌倒就「瞓喺度唱」，更用自己作例子，怎料與周國豐爆火花。
相關閱讀：《中年好聲音4》7強名單洩漏惹爭議 周志康爆錄影清場力證「未必真」 陳旭培力撐無內定
相關閱讀：中年好聲音4｜周志康奪MVP係最後高光時刻？ 一舉動疑證遭淘汰 網民望樂易玲力挽狂瀾
周國豐聽到肥媽曾演繹〈卡門〉（Carmen）時，爆出一句：「冇凹到個台？」肥媽即火爆回覆：「冇冧到呀個台！撞鬼你呀！死你就去啦！死仔咁樣講嘢嘅咩你。」車婉婉幫口補救：「佢（周國豐）五行欠（打）」。肥媽激動到企起身指住周國豐：「肥係無罪嘅！以前肥嘅人可以做楊貴妃㗎。」周國豐未怕得罪肥媽，連講三聲「乖」平悉息肥媽怒火。
鄭仲豪幼腿受關注
其後鄭仲豪唱出張立基的〈Electric Girl〉，大晒一雙幼腿，被周國豐在點評時，將焦點放在鄭仲豪的身形上：「嘩！仲豪你對腳好瘦喎，好似兩枝藤條咁。」再度燃點肥媽的怒火。肥媽當場忍不住質疑周國豐：「呀評判，你唔係話人肥就話人瘦。點解咁奇怪呢？你應該評歌嘛，你講size嘅。」不過周國豐解釋後，肥媽都忍不住笑，充滿綜藝效果。
許美琪奪今集MVP爆喊
雖然陳旭培揀選梅艷芳的〈蔓珠莎華〉獲得93分，成為全晚最高分的參賽者，但最終由譚耀文選出今集MVP，最終由唱出容祖兒〈這分鐘更愛你〉的許美琪奪得，有名喊包「琪」的許美琪再度淚灑台上，表現激動。
相關閱讀：中年好聲音4丨前評審伍仲衡暗寸吳亦偉：以為唱緊泰文 避談好友周國豐評分標準？
