杜德偉演唱會｜與兒子AJ三代同堂隔空合唱Alex感動落淚 黃子華林敏驄呂方到場欣賞
發佈時間：11:29 2025-10-20 HKT
杜德偉（Alex）一連兩場《Get Up世界巡迴演唱會》昨晚（19日）在紅館舉行尾場，眾多杜德偉圈中好友捧場，包括吳建豪與媽媽、黃子華、草蜢、林敏驄、呂方與老婆和女兒、李思林與媽媽、杜德智、方力申、李樂詩、朱鑑然、肥仔@ERROR、李幸倪（Gin Lee）及羅金榮等。
杜德偉演唱會｜多謝兒子AJ同學入場
來到尾場，氣氛非常熱烈，杜德偉指今日不似演唱會，因在後台時不停有人打招呼，而永不言休的他更笑言若要開告別演唱會，也是因為要開復出演唱會。杜德偉表示近年身份不同，因做了爸爸，又謂做了爸爸會經常想起自己爸爸。他指若爸爸仍在，現在應會坐在台下跟大家揮手，杜德偉又指和爸爸感情非常好，故對方離開時很難過，不過當時有長輩安慰他，叫他不要難過：「你Daddy雖然暫時離開，但將來會一點一滴返嚟你身上，到時你就變成你Daddy，所有認識我嘅朋友，都會叫我Daddy一聲Alex Daddy，最近有次見仔仔同學嘅Daddy Mommy，佢哋叫我一聲AJ Daddy，我就忽然間明白晒！」
杜德偉演唱會｜叫草蜢、黃子華「脫掉」
之後舞台上重現杜德偉與爸爸及兒子AJ一起三代同堂隔空合唱《What a Wonderful World》，而Alex也感動落淚，然後又錫了AJ一啖，唱完後AJ說：「大家好我係AJ，多謝嚟到我爸爸演唱會！」Alex笑言多謝AJ同學入場，降低會場平均年齡，而AJ的朋友亦送上鮮花和公仔，搞到Alex忍不住表示「我冇花㖭！」之後他跟AJ說，這是他人生第一個參與的紅館演唱會，跟住就暫別樂壇，非常搞笑。Alex隨後又在台上指太太外柔內剛，會鞭策他做得更好，故自己需努力平衡，不想被太太食住，更笑言：「表面上畀佢食住，但心𥚃唔可以畀佢食住。」又指視太太為靈魂伴侶，更向太太示愛講「I Love you」。到了互動環節，一向鬼馬的林敏驄用螢光棒先搞杜德智，之後就敲黃子華的頭，之後唱《脫掉》時，Alex就叫草蜢、黃子華脫掉。
杜德偉演唱會｜讚兒子AJ懂關心他人
Alex在完騷後受訪，他指開完兩場後覺得不夠喉，但點到即止也不錯。提到跟兒子AJ一起在台上與杜爸爸隔空對唱，他指綵排時已很感動，尤其當咪高峰升上台的一刻，他指可能因香港是自己的主場，加上很多很錫自己的親戚和朋友在場，所以比上次台灣更感動，自己也忍不住喊。不過杜德偉亦大讚兒子AJ表現非常好，又勇敢，好搞笑及有幽默感，問到如何獎勵兒子？他笑指每天也有奬勵：「我希望佢可以有一個好難忘嘅晚上，佢應該會覺得好驕傲，因為佢返學校嘅時候，會有好多同學同佢分享返現場嘅感覺，最緊要係畀到一種自信心佢。」他爆兒子為了上台忍口，故落台後馬上食嘢，又指兒子平常社交好，加上性格沒所謂，也識關心人，所以同學們也很喜歡他。
對於兩場演唱會均吸引不少圈中人捧場，Alex指大家也很錫自己，也有很多很久沒見的朋友來，所以比較像舊生聚會而不是演唱會。至於今次請來林志穎做嘉賓，問到覺得兩人誰Keep得較好，Alex即表示自己大對方12年，不過當指他的樣貌也沒有變的時候，Alex即笑說：「有分別，靚仔咗吖嘛！」
杜德偉演唱會｜肥仔@ERROR玩到除衫
對於他在個唱上表示，希望下次再開騷是5年而不是10年，問他是否已有這打算，Alex表示隨緣，因自己不是一個很主動去爭取的人，但若然要做，就會做到最好。Alex表示，唱《脫掉》時見到台下玩得開心，台上台下融為一體，真的覺得此生難忘，更笑指肥仔@ERROR也玩到除衫：『佢走入嚟話，我頭先剝咗衫，你睇吓！』（點解你唔剝衫？）我剝衫？仲剝？60幾喇，攞到個feel咪算囉，我都有剝，上身，剝埋條褲，（由三角褲變boxer！）呢首《脫掉》已經變成一種行為藝術，大家feel到脫掉嗰種感覺，嗰種行為就已經OK，點到為止！」
對於久未露面的呂方也帶女兒一起來睇騷，他指跟對方經常見面與食飯，問到會否對親家？他即說：「係喎！我唔介意！」演唱會上， Alex也提到太太食住他，他表示已結婚沒所謂，對於太太在台下為他打點所有事情，Alex說：「佢咁樣我點可以唔做好自己，佢用行動嚟鞭策我，所有嘢都做到咁好，去到我自己嘅強項，我都一定要做得好好，先可以平衡呢個陰陽嘅平衡關係。」
杜德偉演唱會｜爆《風林火山》被刪戲份
另外，Alex表示已看過有份主演的電影《風林火山》，雖然他表示很喜歡，但提到有觀眾表示他的戲份太少，Alex就自爆有一場戲被cut：「嗰場戲我好喜歡，Juno（麥浚龍）都好鍾意，係講政府用軍機押解我返香港，喺軍機上我做咗啲好恐怖嘅嘢，話畀大家聽，呢個角色係好恐怖。佢癲㗎嘛，佢做咗樣嘢令大家覺得，佢可以用最少嘅嘢傷害到所有人，冇呢part，出到嚟就冇呢種力量。」Alex希望日後有加長版，可令這場戲重見天日。
