盧瀚霆樂做MIRROR隊友「樹窿」 預告演唱會性感尺度丨名人雜誌

MIRROR成員盧瀚霆（Anson Lo）將會舉行其第二次個人演唱會，預告會有高量跳唱及性感尺度，兩年前放慢生活節奏，接觸了大自然心態變強，成為MIRROR隊友「樹窿」的Lo點名團中2名成員最能夠接收他的負面情緒。撰文：陳凱詩  攝影：譚志光

Lo於2023年舉行的首個演唱會以「The Stage」為主題，事隔兩年多，12月6日將會舉行一連4場《ANSON LO "KINGDOM" LIVE 2025》，今次將延續這個概念，來一個昇華版，以「KINGDOM」為主題，Lo解釋道：「The Stage係講屬於自己嘅舞台，今次想昇華少少，擴大個scale，所以叫做『KINGDOM』，寓意屬於Anson Lo舞台嘅國度係一件咩事，加上『KINGDOM』呢個字有國度區域感覺，有一種民族色彩嘅art direction喺裏面，所以今次就會以一個埃及主題去包含晒成個演唱會嘅theme。」

年初已積極備戰

今次演唱會將以「跳唱國度」為核心，Lo指觀眾將會看到各式各樣不同風格的舞蹈與音樂：「會覺得去咗一個空間，全部都係跳唱嘅，會係好high energy嘅一個表演，而跳唱部分嘅激烈程度會比兩年前首個演唱會為多。『KINGDOM』呢個概念我喺2025年初已經諗好，所以知道自己會有高量度跳唱，於是年初我會話想練氣、跑步、做多啲Cardio，就係因為我預計到會激烈過第一次演唱會。」
早於年初已開始積極備戰的Lo ，每星期會做3至5次gym兼跑步，務求以最佳狀態示人，以前在跑步機跑步，但近半年開始跑街，Lo坦言：「跑步機好悶，我鍾意跑街，喺唔同街道跑好有新鮮感！（有冇撞到人？）其實我唔知㗎，因為好多時我都好專注，塞住耳機聽住歌，望住地下跑。的確試過遇到神徒或者路人，但好尷尬，因為我塞住耳機唔知大家嗌我，所以佢哋會拍我膊頭。（有冇好驚？）都會好surprise，加上我喺跑步徑跑，確保係好安全，所以聽歌會播大聲啲。」

預告性感尺度

Lo透露今次個唱會有不少與埃及有關的服裝，設計相對浮誇大膽，當問到其性感尺度時，他笑言自早前現身新加坡的亞洲音樂盛會Waterbomb，穿上小背心的他，爆肌濕身跳唱逾半小時後，發現他與神徒（粉絲暱稱）對性感的定義不太一致，Lo笑言：「所以我唔夠膽再講咩叫性感，但會有一啲大家想睇嘅嘢，想睇嘅程度。其實我個風格都唔係shirtless（赤裸上身），唔會去到唔着衫，會係若隱若現露啲唔露啲，大家入場睇就知啦！」

國際舞台獲益良多

近來Lo先後衝出香港，除Waterbomb外，還出席了韓國音樂盛典《2025 The Fact Music Awards》（TMA）頒獎典禮擔任表演嘉賓，獲益良多的他︰「學咗好多嘢，親眼見到好多唔同國家嘅前輩，佢哋喺後台準備好專注，keep住不停mark舞練習，一定係最佳狀態先上台，喺側邊見到佢哋喺台上面唱歌跳舞，真係好大力，好誇張地好，其實都激勵到自己，更加覺得自己好唔夠，喺表演上面真係可以再做好好多。」

開騷全唱自己歌

Lo在首個演唱會邀來陳慧琳，蔡卓妍、Dear Jane擔任嘉賓，問到今次會否有驚喜？他卻大賣關子：「未知道，公司仲商討緊請邊個前輩好。（想請舞台皇者郭富城嗎？）如果請到郭富城梗係好啦，希望可以，但嘉賓係surprise，到時大家入場就知。」
歌單方面他就預告今次會全部唱自己的歌曲，主要是因為自己歌曲都儲夠一定數量：「雖然唔係好多，但夠開一場演唱會，同埋相信神徒都會想聽我唱自己歌多啲。」

交代身體狀況

Lo早前身體響起警號，並曾於6月入院做手術，他續交代身體狀況表示：「其實手術本身schedule咗係演唱會之後先做。但因安全問題，發覺越早做越好，所以前排就做咗。（冇乜手尾？）希望冇啦，依家暫時順利，身體應付到演唱會。」

今年7月Lo正式迎來了30歲，「30而立」的他自覺最大轉變是成熟了不少：「尤其近排我屋企人搬咗，有一種望住屋企人開心，自己就會好開心，覺得所有嘢都好完美。譬如每一次去屋企人度食飯，見到佢哋屋企好靚，個景好靚，佢哋又會話住得好舒服，就會覺得就算要再努力賺錢，所有嘢都好值得，因為見到佢哋真係in the very good place，好滿意依家嘅生活質素，我已經覺得好好，頓時都覺得自己大個仔啦。」

樂做隊友「樹窿」

除了照顧家人，Lo近年亦成為了MIRROR成員的「樹窿」。Edan（呂爵安）早前在演唱會上，公開感激他一直以來的支持，並稱Lo為「一生嘅好朋友」、「老best」。Lo坦言：「我都真係幾照顧身邊朋友嘅情緒，MIRROR隊友時不時都會搵我傾偈，可能我本身係一個比較正能量嘅人。」他續指因為兩年前自己生活節奏放慢，接觸了大自然學會了感恩，心裏有一種平靜而變得更堅強，因此間中亦可以成為別人的「樹窿」。

「樹窿」也要找人傾訴

Lo指自己亦不會100%可以正能量，近來亦是他一個大壓力的時候，除了出專輯，還有新歌、新歌MV、演唱會的事要忙，「全部都係我好重視嘅project，呢個時候我需要『樹窿』多啲，感到壓力大時會找父母傾訴，未必會找朋友，可能朋友近排能量值都好低，我唔想加重佢負擔，咁不如搵一啲強大啲嘅人，可以接得住你情緒嘅人，相得益彰。」目前在MIRROR當中Jeremy （李駿傑）和Jer （柳應廷）兩位成員都是可以接得到他情緒的人。

親選與神徒大合唱歌曲

7月在30歲生日會上，Lo與神徒大合唱《不可愛教主》，問到演唱會想跟神徒全場大合唱哪一首歌曲？ 他就選擇了即將推出專輯的最後一首歌：「今次album歌曲排序係我自己排，我特登揀送畀神徒嗰首歌放喺最尾，因為我覺得用我對神徒嘅愛，同埋神徒對我嘅支持，去包返呢一個我嘅career嘅國度，呢件事係好有意義，所以我好想大家鍾意呢首歌，到時同我一齊唱，畫面會好唯美。」
最後Lo感激很多揚言會「全勤」睇足4場演唱會的神徒，預告會送上專屬厚禮：「睇晒咁多場嘅神徒，真係要讚，要畀個豬仔印你，我都好希望可以每一晚見到大家。」

化妝：Rainbow Chung @ Annie G. Chan Makeup Centre
髮型：Denny Ku @ CHIC Private I Salon
服裝：IT, BOTH  造型：PIPA Creative 
場地：Lubuds Group, FWD House 1881