女神配對計劃丨葉蒨文曾展望眾望所歸同房過夜 Sophie冇女神包袱坦蕩蕩Cutie度爆燈 因一事GM被嫌未夠主動
發佈時間：22:00 2025-08-01 HKT
TVB戀愛綜藝真人騷《女神配對計劃》周日（3日）播出第九集，今集將有大家最期待畫面，就是「國民CP」葉蒨文（Sophie）與曾展望（GM）將眾望所歸同房宿一宵！由於五大女神的Camping Room均只有一張大床，葉蒨文與其餘四位女神李芷晴（Stephanie）、羅毓儀（Yuki）、關嘉敏（Carman）及梁敏巧（Maggie）均為了「同床」或「不同床」煩惱不已。
「國民CP」葉蒨文曾展望Sweet到痺
以可愛又搞笑見稱「國民CP」葉蒨文與曾展望，面對製作組的「玩嘢級難題」，葉蒨文竟想到猜包剪揼解決！自節目第一集開始已散播不少「粉紅泡泡」的葉蒨文與曾展望，連猜個包剪揼都冧樣大放送，絕對Sweet到痺！曾展望只問了一句：「咁你出咩？」即氹得葉蒨文展現如花笑意；期間佻皮的曾展望還故意與葉蒨文一起出揼，令葉蒨文囉囉攣！最終曾展望雖刻意輸給葉蒨文，但仍不忘口花花指自己瞓地下「驚風濕」，逗得葉蒨文甜笑寸曾展望：「幾多歲呀你？！」
相關閱讀：女神配對計劃｜一張瘋傳照片含驚人劇透？ 疑成功配對情侶旺角拖手被捕獲 男方曾被《東周刊》爆「港姐殺手」黑歷史
曾展望能與葉蒨文同房兼同床大感興奮
曾展望事後接受製作組訪問，坦言能與葉蒨文同房兼有機會同床大感興奮：「我鍾意嘅人，我一定開心。如果我話我好驚，『唉呀！唔好呀！男女授授不親』，咁好假啦，但我主要擔心佢會唔會（覺得）唔舒服咯。」面對曾展望的厚顏強攻，葉蒨文未知會否屈服與他同床？除了葉蒨文與曾展望同房的甜蜜點滴值得期待，葉蒨文還會在鏡頭面前展現素顏兼「熊貓就寢」look，Cutie度爆燈。雖然葉蒨文明顯情傾曾展望，但曾展望依然未有「怠慢」、連環爆發小宇宙花式氹爆女神。在同房前的一對一熱身賽中，二人需合作猜題目！原本與葉蒨文合拍到爆、一估即中的曾展望，去到「十指緊扣」這條題目時，即詐傻扮懵，任憑葉蒨文如何扭六壬將曾展望手指舞來舞去，曾展望依然智商急降亂答一通：「雙手合十」、「祈求天父」！曾展望的賴皮，獲現場女神及閨密花生團一致噓爆：「扮嘢啦你」、「專登嘅」。冇晒符的葉蒨文最終只能捉緊曾展望其中一隻手來個真‧十指緊扣，引發全場歡呼+嚧聲，曾展望更是得戚冧樣盡出。事後葉蒨文冧豬樣直指覺得與曾展望很夾：「我哋拍劇嗰陣已經一拍即合架喇，我覺我同曾展望係天生有默契」，說畢還Bling Bling讚爆曾展望：「曾展望叻叻呀！」
曾展望葉蒨文全場大讚二人夾到痺
身為節目的「口花擔當」，曾展望除勁識氹葉蒨文開心，就連葉蒨文嬲嬲豬亦能瞬間化險為夷。話說在玩另一個遊戲時，梁敏巧突然指想睇葉蒨文呷醋樣，葉蒨文隨即引爆：「咪呷醋咗好多次囉，今日」，火勢更瞬間蔓延演變至「質問」曾展望：「今日梁敏巧晏晝喺嗰邊枱幫你撥頭髮，你見唔見到我望咗過嚟呀？」感覺到氣息不對的曾展望，火速四両撥千斤謂：「你（梁敏巧）做咩幫我撥頭髮唔同我講呀，點解我唔知嘅？！」、「我以後寧願畀蟲咬，在場女士唔好幫我撥！」、「一係你以後大力啲一巴冚埋嚟。」面對曾展望輕鬆地無厘正經帶過難題，關嘉敏大表佩服：「佢咁樣答，根本嬲佢唔落。」李芷晴則直指曾展望擁有葉蒨文喜歡的風趣特質，全場大讚二人夾到痺。
相關閱讀：女神配對計劃丨葉蒨文「狠撇」前度遭家人朋友質疑兼不諒解 撰長文罕談分手原因：再等唔到落去
曾展望同組對手展攻勢絕非「零危機」
雖然曾展望與葉蒨文又夾又甜蜜，但曾展望卻非「零危機」。由於曾展望同組對手林澤謙（Him）及林堡熙（Eddie）不但外形吸引，二人還與葉蒨文有不少正面互動，葉蒨文更一度因二人太好而直指覺得曾展望未夠好：「我最有好感嗰個，佢一路都冇做咩嘢，但側邊嗰兩個人不斷畀我嘢，然後我就覺得對嗰兩個好愧疚。」葉蒨文坦言直到曾展望在「心意配對遊戲」中，放下平時的嬉皮笑臉、說了一句極認真的話，葉蒨文才如釋重負，大讚曾展望 Man爆的同時，還直指：「我終於覺得呢條鎖匙畀得值喇！」到底曾展望說了甚麼話令S葉蒨文一秒改觀？除了被葉蒨文嫌未夠主動，曾展望還要面對阿Him與Eddie強攻！在曾展望與葉蒨文同房期間，阿Him與Eddie輪流主動約會葉蒨文，雖然曾展望表面OK，但內心不無擔憂，更搞笑扮扯火謂：「搵夠葉蒨文未呀？！有咩傾下次搵埋我一齊傾吖嘛。」
