78歲影壇女強人住富貴長者屋兩年：起初唔想搬入去 至今未婚不滿被指慘 通完波仔決心戒煙
發佈時間：14:30 2025-07-27 HKT
78歲名導許鞍華近日接受資深傳媒人汪曼玲YouTube節目訪問，談到近來的生活，除了分享健康近況，也分享入住房協轄下的「富貴長者屋」感受。許鞍華表示最初一直不想搬入去，她說：「因為覺得好似入面啲人個個都七老八十，我自己都係啦，我唔想被影響到，但入到去反而好受鼓舞。」
許鞍華購入「富貴長者屋」六百呎單位
許鞍華購買「富貴長者屋」並於兩年前遷入單位，她透露單位面積六百呎，有兩房一廳，最開心是可以享受私人空間，不用勉強跟其他公公婆婆交流，「佢哋唔理你㗎，佢哋覺得你最好唔好搞佢。」許鞍華以前一直與媽媽同住，年紀漸長都希望有人照顧，於是搬入「富貴長者屋」，她非常滿意職員在屋苑範圍見到老人的態度，「啲職員佢哋受到嘅教育非常好，佢哋好專業，唔會當你老人家，吓吓叫你小心行，唔會咁，但其實佢哋好照顧你。譬如有嘢要修理，叫完即刻就上嚟整，又收好少錢，非常有禮貌。」許鞍華表示每早見到一些跟她差不多年紀的老人家準時到健身室做運動，令她都表示佩服。
相關閱讀：金馬獎2023丨李玟身影現大屏幕！小提琴家奏《月光愛人》悼念 張艾嘉許鞍華一臉哀傷
許鞍華至今未婚
許鞍華在影壇獲獎無數，她的鏡頭下粒粒巨星，2020年更獲得第77屆威尼斯電影節授予的「終身成就金獅獎」，是全球首位獲得該獎項的女導演，代表香港揚威國際。她沒有結婚也沒有兒女，將一生都奉獻給電影，曾表示覺得電影比組織家庭更重要。但外界有些人認為未婚就等於慘，她不滿這種標籤人的說法，「我有啲反感囉，因為我唔係咁慘，但係唔知點解就變成一個標籤，話你冇結婚又乜呀……我話大把人都冇結婚啦！大把人離婚啦！點解一昧要覺得我好慘。」此外，她表示早年她經常被提及沒有物業，她認為雖然是事實，但未免提及得太多。她說：「人哋揀唔買樓，點解講到咁大件事呢？」
相關閱讀：文念中執導許鞍華紀錄片《好好拍電影》 獲發哥帶領跑山團友撐場
許鞍華年老怕跌倒
許鞍華指，由於現時已78歲，好怕會跌倒，可能要休養很久才康復。許鞍華表示自己健康也曾出問題，早已接受隨時會離開這個世界，但對「老」仍有一份恐慌，許鞍華說：「簡直恐慌呀！包括健康會唔好，精力會衰退、失智……冇辦法避免。我而家就畀心機做運動，食嘢又會注意，又戒咗煙。」許鞍華指自己曾經煙癮很大，半小時就點一支煙，直至近年通完波仔，就決心戒煙。許鞍華表示仍未退休，但生活過得很舒適，但對電影仍有熱誠。
