東張西望丨兒子質疑父殺母？查亡母自殺真相父子對質爆衝突 解剖報告揭死者多達16處傷痕
發佈時間：22:00 2025-07-09 HKT
TVB節目《東張西望》今晚繼續報道一宗24年前的自殺事件，報料人「天寶」懷疑母親24年前身亡另有內情。有指天寶母親當年因難忍癌魔折磨，發生悲劇，但兒子天寶去年翻查母親自殺案時，得悉亡母的解剖報告中，並沒顯示患癌跡象，身上更有多處傷痕，更可能與父親有關。
東張西望丨父母關係欠佳
節目昨晚報道天寶任職小學教師的母親，於2001年2月在家中花園的車內燒炭自殺，天寶父親同為教師。天寶當時年僅10歲，對母親自殺原因不明，只知父母關係欠佳。天寶回想起母親尋死早有端倪，天寶從大姨口中獲悉母親及家人早知父親有第三者，有指外遇對象就是之後同是教師的「繼母」。
相關閲讀：東張西望丨「劉德華」FB搵新目標開價$X,XXX 「現聲」證身份稱夫妻關係有變已單身
東張西望丨兒子懷疑母親24年前自殺有內情：
東張西望丨大姨稱妹夫出軌
今集《東張》播出天寶透過社交平台搵到失聯多年的大姨，大姨爆料天寶父親當年出軌：「佢有第三者，我哋知，佢學校全部（人）都知，佢唔認，佢話冇。我哋懷疑佢（妹妹）因為三年來嘅折磨，佢平時唔會飲酒，唔知幾時開始飲，我細妹可能太辛苦，可能咁樣自殺。」
東張西望丨鄰居口中爆真相
大姨表示當年從妹妹的鄰居口中得悉疑似真相：「架車防盜響咗半個鐘至1個鐘，佢都唔出嚟，響到成條村醒晒，見佢冇反應，管理處打俾妹夫冇人聽，管理員去屋企拍門，撳鐘，都撳咗好耐佢先出嚟。個過程係咪有啲疑問，佢（妹夫）係咪知佢自殺而唔去救佢呢？」大姨指妹夫曾露面，未知是否不慎碰到座駕，導致響警報。
東張西望丨重案組介入調查
大姨續稱事發後一個月，重案組一度介入調查，大姨表示：「我細妹死嗰時，佢老公拖咗佢落地下等救護車，原來佢大仔醒咗，佢（大仔）話佢老竇用手撳住媽媽手腕脈搏，然後睇住手錶。佢係教體育，佢唔會唔識急救，佢係咪應該做急救呀？唔做急救點解要摸住佢脈搏睇錶。」
東張西望丨妹妹曾轉帳巨款
天寶大姨複述當時警方調查的結果，指妹妹未有患乳癌：「我妹妹係一個好慳嘅人，佢所有碌卡開支都係超級市場，冇喺第度使大筆錢。（警方）查過佢冇買股票記錄，細妹將一嚿錢俾咗一個女人。」
東張西望丨父親再娶教師
天寶透露在母親過世後兩、三年，父親再娶同為教師的繼母：「個小三就係我媽媽過身之後，再娶呢個。」天寶續說：「爸爸將啲罪名推晒俾媽媽，隱瞞好多未講嘅嘢，講咗好多懷疑係大話。」天寶曾考慮曝光事件後會與父親關係決裂，但他認為要保護母親：「唔係我，我唔係主要因素，係佢（父親）嘅行為導致關係決裂。」
東張西望丨吸入一氧化碳含量低
天寶曾到法院死因裁判庭取回媽媽的解剖報告，天寶表示：「我媽媽冇乳癌，媽媽吸入一氧化碳含量好低，可能唔足以導致一個人死亡。見到我阿媽頸、背脊、膝頭多處傷痕，如果俾我發現到我媽生前，唔知佢係郁手，動手傷害過我阿媽，我一定會循法律途徑（追討）。」
東張西望丨排除癌病折磨尋死
天寶母親的化驗報告列出幾點：「屍檢沒有發現乳房有惡性疾病」，所以因癌病折磨而自殺的原因可以剔除。報告列出吸入的一氧化碳，「碳氧血紅素飽和度為24%，水平似乎沒有達到足以解釋她死亡的唯一原因」。令人意外是報告的首頁，列出死者身體多處曾經出現受過暴力對待，多達16處身體傷痕，「右大腿內側近期出現小片狀點狀擦傷，面積約17公分 x 4公分；左側腹股溝區域和左上大腿內側前部，近期出現小片狀點狀擦傷面積約20公分 x 8公分。」
東張西望丨天寶質問父親
天寶約父親見面前先拜祭母親，卻臨時遭爸爸甩底，天寶之後上門聲討父親。天寶見到父親時一度情緒失控，質問爸爸當年指母親患乳癌，天寶爸爸狀即時報警：「有一名男子喺度叫囂。」天寶與父親一言不合，雙方展開推撞。天寶父親表示：「你依家掂到我喇！」又用手電筒照向天寶及鏡頭。天寶激動問爸爸是否要繼續狡辯。
東張西望丨天寶父拒受訪
《東張》之後聯絡上天寶的父親，但對方拒絕任何形式的訪問，不過面談期間回應「為何拒絕交出遺產管理人身份？」天寶父親表示：「並無有關身份、只有媽媽生前證件、可以協助天寶追查、天寶無權使用文件」。天寶父親回應是否有小三：「承認有小三、時間點不配合、並無確切交代」。至於亡妻被報道患癌：「報章引述由其夫透露，表示當時情緒混亂，『你鍾意點寫就點寫』引致結果。」天寶認為如果有人做錯事，涉及法律問題，覺得應該要接受法律制裁。
相關閲讀：東張西望丨「劉德華」稱要錢買藥行騙72歲老婦$XX,XXX 再派「女兒」周旋獲信任：叫我媽媽
防止自殺求助熱線：
「情緒通」精神健康支援熱線：18111
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
賽馬會青少年情緒健康網上支援平台「Open 噏」：http://www.openup.hk
