伍富橋發表「審美論」撐賢妻靚女：醜過佢大把 嬲爆獻醜不如藏拙酸語丨獨家
發佈時間：07:00 2025-01-10
被封為「億萬駙馬」的伍富橋與富家老婆梁兆楹（Shirley）婚姻備受矚目，最近他推出新歌《一劇之本》，分享婚後兩年多的心路歷程，面對海量「軟飯王」、「男人典範」等尖酸刻薄人生攻擊，他仍然啃得落，唯獨抨擊埋Shirley「獻醜不如藏拙」，「愛妻號」伍富橋即反面：「我都好想見吓佢(網民)有幾靚喎！」伍富橋還發表「審美論」護妻，Man到爆。 採訪：方騫平 攝影：朱偉彥 場地：Dawnxlab
繼前年5月推出冧妻作《很多很多份之一》賀結婚一周年後，最近藉新歌，對自己入行10年來的小總結，並分享婚後與富貴太太面對網絡上海量的閒言閒語的心路歷程。他坦言要求填詞人小克老師修改3次後，歌詞啱晒心意「緣份哪可分背景，相戀求尊敬，輿論裡，數千斤壓力，觀眾不知道是剃刀…」句句到肉，唱出心聲。
被偷食風波老婆夠「雷」
每唱這首歌，伍富橋都有感受，他有感而發說：「由拍拖到結婚一直有好多評語，自己及長輩壓力都會影響到兩公婆關係，尤其『被偷食事件』，當時正值展開太太生日旅程，Shirley喺飛機上接到IG私訊，用假帳戶留言『你老公偷食』、『我有你老公偷食證據喺手』，坦白講咁嘅狀況有懷疑係好正常，但佢只係輕描淡寫，問我『你有冇呀？』仲二話不説企喺我立場發聲話『我哋兩公婆，有唔緊要嘅，我幫你拆咗佢先！』太太嘅表現令我內心嘩然，佢好勁，講嘅嘢唔簡單，唔係普通人能講得出口，真係好有『雷』，更加感受到佢好愛我，呢啲係我嘅福氣…我都好愛佢！」然而他相信Shirley心底係會介意今次的無中生有風波，並且紀錄在案。
30歲年紀要搵個老婆
越來越愛Shirley的伍富橋對太太讚口不絕：「佢EQ好高人又聰明，更懂得人情世故，煮嘢又叻，我哋一凹一凸，佢可以補到我嘅不足，我覺得內在美比外在重要，就算靚又有咩用？因為人會老，花無百日紅，反而內涵只會有增冇減，同埋去到我30歲呢個年紀係想搵個老婆，Shirley係個賢內助。」因此，伍富橋對網民狂踩Shirley外表，表示心痛及愧疚，護妻道：「其實我娶老婆，佢咩樣我都唔介意，咁關你哋咩事？你話佢好醜？我又唔覺係喎，我眼中佢個樣靚囉，永遠喺老公視覺自己老婆係靚，講真呀，靚過佢嘅人一定有，醜過佢嘅人亦有大把，所以我鍾意咪得囉，佢又唔係做藝人點解要抨擊佢外表呀？就算做幕前都有唔靚嘅角色啦。」
今年會做返多啲幕前
對於有網民激烈留言，叫Shirley「獻醜不如藏拙」，伍富橋聽到火都嚟駁斥說：「咩叫獻醜呀？佢邊方面出醜？我好想見吓留言網民有幾靚，約出嚟食飯見下面！不過，呢個年代乜嘢都有人講，所以要向好方面去諗。」伍富橋從負面新聞中作出檢討，明白自己要有改善：「可能我婚後少咗做幕前，網民覺得我游手好閒唔使返工，其實我經常喺健身室做教練，仲會教中學生跳舞，只不過冇乜出PO，冇刻意攞出嚟講。趁住入行10周年攞到服務金牌，今年會做返多啲幕前，建立返一個積極形象，3年冇拍戲都想拍返，仲會向住唱歌初心進發，未來會做多啲音樂。」
