伍富桥发表「审美论」撑贤妻靓女：丑过佢大把 嬲爆献丑不如藏拙酸语丨独家
发布时间：07:00 2025-01-10 HKT
被封为「亿万驸马」的伍富桥与富家老婆梁兆楹（Shirley）婚姻备受瞩目，最近他推出新歌《一剧之本》，分享婚后两年多的心路历程，面对海量「软饭王」、「男人典范」等尖酸刻薄人生攻击，他仍然啃得落，唯独抨击埋Shirley「献丑不如藏拙」，「爱妻号」伍富桥即反面：「我都好想见吓佢(网民)有几靓㖞！」伍富桥还发表「审美论」护妻，Man到爆。 采访：方骞平 摄影：朱伟彦 场地：Dawnxlab
继前年5月推出冧妻作《很多很多份之一》贺结婚一周年后，最近藉新歌，对自己入行10年来的小总结，并分享婚后与富贵太太面对网络上海量的闲言闲语的心路历程。他坦言要求填词人小克老师修改3次后，歌词啱晒心意「缘份哪可分背景，相恋求尊敬，舆论里，数千斤压力，观众不知道是剃刀…」句句到肉，唱出心声。
被偷食风波老婆够「雷」
每唱这首歌，伍富桥都有感受，他有感而发说：「由拍拖到结婚一直有好多评语，自己及长辈压力都会影响到两公婆关系，尤其『被偷食事件』，当时正值展开太太生日旅程，Shirley喺飞机上接到IG私讯，用假帐户留言『你老公偷食』、『我有你老公偷食证据喺手』，坦白讲咁嘅状况有怀疑系好正常，但佢只系轻描淡写，问我『你有冇呀？』仲二话不说企喺我立场发声话『我哋两公婆，有唔紧要嘅，我帮你拆咗佢先！』太太嘅表现令我内心哗然，佢好劲，讲嘅嘢唔简单，唔系普通人能讲得出口，真系好有『雷』，更加感受到佢好爱我，呢啲系我嘅福气…我都好爱佢！」然而他相信Shirley心底系会介意今次的无中生有风波，并且纪录在案。
30岁年纪要揾个老婆
越来越爱Shirley的伍富桥对太太赞口不绝：「佢EQ好高人又聪明，更懂得人情世故，煮嘢又叻，我哋一凹一凸，佢可以补到我嘅不足，我觉得内在美比外在重要，就算靓又有咩用？因为人会老，花无百日红，反而内涵只会有增冇减，同埋去到我30岁呢个年纪系想揾个老婆，Shirley系个贤内助。」因此，伍富桥对网民狂踩Shirley外表，表示心痛及愧疚，护妻道：「其实我娶老婆，佢咩样我都唔介意，咁关你哋咩事？你话佢好丑？我又唔觉系㖞，我眼中佢个样靓啰，永远喺老公视觉自己老婆系靓，讲真呀，靓过佢嘅人一定有，丑过佢嘅人亦有大把，所以我钟意咪得啰，佢又唔系做艺人点解要抨击佢外表呀？就算做幕前都有唔靓嘅角色啦。」
今年会做返多啲幕前
对于有网民激烈留言，叫Shirley「献丑不如藏拙」，伍富桥听到火都嚟驳斥说：「咩叫献丑呀？佢边方面出丑？我好想见吓留言网民有几靓，约出嚟食饭见下面！不过，呢个年代乜嘢都有人讲，所以要向好方面去谂。」伍富桥从负面新闻中作出检讨，明白自己要有改善：「可能我婚后少咗做幕前，网民觉得我游手好闲唔使返工，其实我经常喺健身室做教练，仲会教中学生跳舞，只不过冇乜出PO，冇刻意攞出嚟讲。趁住入行10周年攞到服务金牌，今年会做返多啲幕前，建立返一个积极形象，3年冇拍戏都想拍返，仲会向住唱歌初心进发，未来会做多啲音乐。」
