薛家燕、冼靖峰及關楓馨等與一眾參賽者今日（30日）在將軍澳出席節目《家常便飯爭霸戰》。

薛家燕曾跟李曾超群學煮餸因仔女煮一大煲燕窩食到驚關楓馨爆關禮傑唔煮齋食意見多

更新時間：19:45 2024-07-30 HKT
發佈時間：19:45 2024-07-30 HKT

薛家燕、冼靖峰及關楓馨等與一眾參賽者今日（30日）在將軍澳出席節目《家常便飯爭霸戰》，家燕姐笑言自己曾在結婚前花一年時間學烹飪，最拿手是蒸魚，關楓馨指鍾意食媽咪薯仔炆雞翼，自己拿手小菜時三色炒豆腐。冼靖峰、關楓馨及阮浩棕在現場即席示範蝦仁炒蛋，關楓馨要兩男打蛋和切蔥，而三人煮食時顯得手忙腳亂，場面搞笑。

家燕姐受訪時表示自己20多歲拍拖時才去學煮餸，因為自己年紀很小時已入行拍戲，根本沒有時間，她指當時去跟李曾超群學煮餸，笑言最初整蛋糕，不過整了7次也是變成薄餅，之後她又去學其他菜式，就連燒臘也識煮。問到仔女是否試過煮嘢食給她，家燕姐就表示仔女在幾歲時，為令她開心，所以在母親節試過煮嘢給她食：「一返到屋企見到個大煲，一打開，成煲都係燕窩，佢原來攞我嗰幾盒燕窩去煮，啲燕窩煮晒喺度，但係見到佢哋好有我心，知我鍾意食燕窩，但唔係成盒咁煮。」她指之後將燕窩放入雪櫃，每日只食一兩匙也食足一個月，邊食邊肉赤，因為當時的燕窩價值約10萬左右，但慶幸那些燕窩是贊助商送的，不過食完那一大煲之後，有幾個月不敢食燕窩。家燕姐又指仔女大個之後去外國讀書，也有特意叫他們學煮飯，自己有時間也會教他們煮。

關楓馨指因以前去外國留學時也會煮食，自己煮西餐比較叻，問到是否試過煮給男友仔？她指大學時有，而現在則煮給爸爸媽媽吃，她笑言爸爸關禮傑不煮齋食還意見多，指他是只會食和批評的「食評家」，又大爆他試過因批評搞到激嬲媽媽：「媽咪叫佢以後自己煮，但佢（爸爸）最後都會食晒，（爸爸有冇煮過嘢畀你食？）最豐盛嘅係煮咗碗公仔麵加煎蛋同芝士。」她又笑言以後找男友要找廚師，這樣她就可以不用煮。

↓立即下載星島頭條App↓