羅毓儀放唔低舊情突爆喊：返唔到轉頭 出道5年「御用學生妹」急彈上女一丨獨家
發佈時間：07:00 2024-05-20
27歲「最強童顏」羅毓儀（Yuki）出道僅5年，已於新劇《神耆小子》中「升呢」女一。不過Yuki事業火速起飛，愛情就未能同步並進，兩個月前跟YouTuber男友Mike和平分手，至今依然放唔低呢段4年情，訪問期間更悲從中來突然爆喊，然後帶淚剖白分手真相，自爆曾經打算復合。加上被口臭網民誤解分手原因，令她非常無奈。採訪：方騫平 攝影：譚志光 場地：尖沙咀Velo Italian Bar & Grill餐廳
兩年前，羅毓儀在劇集《下流上車族》飾演學生妹「車蔓蔓」，憑幾場崩潰爆喊戲獲觀眾係咁畀like，隨即人氣急升劇接劇。在新劇《神耆小子》更首度擢升女主角，跟鄭則仕有唔少對手戲，仲拍住力捧的「妙音龍子」冼靖峰(Archie) 發展感情線，前途一片光明。
剛失戀對愛情冇晒Feel
新劇中Yuki的「錢多多」角色奸奸哋，為達目的大耍手段，甚至「收兵」，跟純情「車蔓蔓」好唔同。她笑說：「上次拍《雙生陌生人》一嚟就同黃庭鋒拍床上嘴咀戲；今次由我負責奪走Archie螢幕初吻，呢場戲喺開鏡一星期後拍，大家未混熟難免有啲緊張，當時Archie驚到全身僵硬，相對我輕鬆啲，因為劇情講我瞓咗，佢偷吻我，所以我乜都唔知。至於第2次Kiss戲就有韓劇feel，男女主角都好sweet。」問到現實生活中可會「收兵」？失戀兩個月的她強顏歡笑：「冇啦！𠵱家好攰，我對現實生活愛情冇乜feel，都係返去虛擬世界，哈！近日打遊戲機識到4個(虛擬)『男朋友』去慰藉心靈。」Yuki強調冇人追求，目前會專心事業，她一臉認真說：「我唔想咁快開始新嘢，一切隨緣啦…」
分咗後曾多次傾過復合
Yuki舊愛Mike曾被網民批評「襯唔起」她，Yuki當年曾力撐對方「超級靚仔有型有才華又可愛」，女方坦言仍未放低舊情，自爆曾多次箍煲，拉扯多時最終都係決定做返朋友。她首度開腔剖白分手原因：「感情事係複雜嘅，主要係工作考慮居多，藝人生活比較煩，衍生溝通、時間、性格及生活模式等問題，唔係一朝一夕嘅事，最初以為可以解決得到，但原來去到某個位就會一發不可收拾，尤其停留橫店4個月拍《巾幗梟雄之懸崖》時變咗Long D(戀愛)。」Yuki坦言曾多次提出，希望互相遷就來維持關係，Mike亦願意付出時間，最終她唔想咁自私，逼對方改變自己：「我今年28歲，開始想將來，屋企人都問我將來有乜打算？我想將多啲時間放喺拍劇，呢方面大家有衝突。」語畢，Yuki即眼有淚光並開始哭訴：「突然冇咗一個人會唔開心，同一個人咁多年，大家陪大家經歷好多，我覺得佢都係一個好人，大家由零開始，一齊好努力去經營YouTube Channel。」
至今Yuki跟前度仍有聯絡，日前女方不慎跌親，出po後Mike亦有傳短訊慰問， Yuki又再次慨嘆愛情好複雜，她真的不懂，越諗越難過的她淚如泉湧，邊拭淚邊說：「以前好美好，好想返去從前唔懂事，唔使顧慮咁多嘅自己，但原來有啲嘢唔係鬧交，唔係翻天覆地，而係會隨時間流逝去改變，就好似沙漏咁逐少逐少溜走，返唔到轉頭。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
緊貼最新最快新聞資訊，請立即下載星島頭條App：https://bit.ly/3Q29Vow
