星8卦丨「咸濕」復出周圍利用人幫自己翻身

更新時間：10:00 2023-06-22
發佈時間：10:00 2023-06-22

「咸濕」有名你叫，成世人以媾女為樂，尤其係紅咗咁多年，隨手就有好多女埋身，免費任佢食。如果唔係之前條女「巴閉」夠狠，後台好硬淨，佢都係繼續有女食到夠，俾「巴閉」公開晒啲醜行，佢都一身蟻，因為要搵大錢一定要三觀正確，「咸濕」幾乎要賣當借都搞唔掂，好彩之前搵落一筆夠佢頂一段日子。

不過「咸濕」好識利用人，近日就搵「迷弟」過橋。自細「迷弟」已經當「咸濕」係偶像，但係一直名氣唔夠，「咸濕」知佢鍾意自己，一直都唔當係嘢。點知「迷弟」星途一直暢旺，「咸濕」至開始覆下人口訊，咁啱「迷弟」要開SHOW，天真地想搵「咸濕」做第一場嘉賓，佢一路愛理不理，唔推但話要度期。

原來係「咸濕」想等自己年尾嘅個唱檔期係咪落實，諗住借香港嚟翻身，到真係攞到個期，佢就即刻應承「迷弟」做嘉賓，希望借佢嘅人氣，等啲迷絲愛屋及烏，我係你偶像嘅偶像，點都俾番三分面。其實「咸濕」係諗住用到「迷弟」盡，連去熱帶區唱都叫「迷弟」隨行做嘉賓，用到人哋盡。「咸濕」好色就人盡皆知，現實勢利亦無因為衰咗咁耐改變下，簡直係人渣中之極渣！