古天樂旋風式突襲媽咪宴請飯局全場Auntie驚喜歡呼秒變粉絲見面會

即時娛樂

更新時間：14:00 2023-03-22
發佈時間：14:00 2023-03-22

現年52歲的古天樂（古仔）是圈中出名的孝順仔，不但多年來一直跟父母同住，每年更必定抽時間陪兩老去旅行，非常重視家庭。早年古天樂以1,000萬收購位於銅鑼灣摩頓台的名廚酒家，日前古媽媽則於該餐廳宴請一班老友，當中包括文雪兒、吳麗珠、佘詩曼媽媽Lily及資深傳媒人汪曼玲等，席間旋風式突襲的古天樂仲氹得全場Auntie勁開心。

【點擊睇古天樂突襲晚宴】：

事後，汪曼玲和文雪兒分別於社交網公開宴會合照，汪曼玲寫道：「古媽媽請吃美味晚餐@名廚，古天樂開工拍廣告，也抽空出現和一班Auntie合照留念。」文雪兒也大讚古天樂是孝順仔。

而當晚古天樂「登場」的影片亦於網上流傳，片中所見，一身全黑Look兼戴黑口罩的他，甫現身即引起全場Auntie歡呼及鼓掌。見大家舉晒手機拍片影相，識做的古天樂秒速除口罩並禮貌地說：「我得1分鐘咋，我得1分鐘咋，快啲，影相邊到影？」在旁的吳麗珠馬上召集全場Auntie來個大合照。雖然趕住開工的古天樂聲稱得一分鐘，但為免一班Auntie失望而回，他最終都逗留多一陣，跟大家影了多張合照，令現場瞬間變成粉絲見面會，相當搞笑，低調的古媽媽則站在一旁等囝囝，作為主人家的她當日亦悉心打扮，更戴上巨型藍寶石戒指，非常搶眼。