海兒 認戀高大靚仔：未打算結婚
發佈時間：03:00 2026-06-24 HKT
TVB歌唱比賽真人騷《中年好聲音》評審之一，29歲的「音樂女神」海兒（陳海兒、Hedy）被今期《東周刊》獨家直擊地下情斷正，日前拍到她獲高大男友體貼接送，拍拖去西環撐枱腳歎咖啡，睇完日落更驅車同返香閨，男友全程對她寵愛照顧冧到爆。海兒昨日向《星島頭條》表示不想影響到身邊愛錫她的人，希望保留私人空間，坦言未打算結婚，重點放在工作上。
日前《東周刊》直擊海兒在中環PMQ獲高大男友駕駛黑色寶馬親自接送，並驅車往西環一間咖啡店撐枱腳，男友全程對海兒照顧有加，見她怕冷氣凍，男方即體貼脫下恤衫為她披上，兩人歎完咖啡轉往海濱長廊漫步睇日落，海兒全程冧爆甜笑，最後男友開車載她一同返薄扶林香閨，繼續甜蜜二人世界。
唔想影響身邊人
海兒昨日回覆《星島頭條》，表示希望保留私人空間：「謝謝大家關心，抱歉自己私事打擾到大家，我入行時間尚淺，之前冇特別提起感情生活，純粹係唔想因為公眾人物呢個身份，影響到身邊一直愛錫我嘅人，所以希望可以保留少少私人空間，目前我未有結婚打算，重點都放在工作上，仲有好多工作上嘅目標想去試，除咗現時女高音同埋導師評審嘅工作，我希望將來可以出到屬於自己嘅歌，甚至開到自己嘅音樂會，同時想喺度趁呢個機會，多謝一直支持我嘅fans，感激一路以嚟在我身邊默默支持我嘅人，我會繼續努力做好自己嘅工作，多謝大家！」
肥媽漏口風爆戀情
海兒是古典女高音歌唱家，先後於香港演藝學院及英國知名音樂學院完成碩士學位，回流香港獲英皇娛樂賞識簽約成為旗下藝人，近年因擔任TVB《中年好聲音》評審而人氣急升，出道短短兩年，海兒憑標緻靚樣及傲人身材，狂吸粉絲，連帶感情生活也備受網民關注。早於今年初，網上已流出海兒與一名爆肌型男的惹火三點式密照，向來對感情事低調的海兒、對此三緘其口，努力保護愛苗，但卻被同為《中年好聲音》評審的肥媽（Maria Cordero）在活動中漏口風爆出「人哋有男朋友」，意外洩密地下情，肥媽更曾在節目暗指海兒特別鍾情靚仔。
