KellyChu - 旅發局邀男神古天樂 拍新片宣傳好客之道 | Executive日記
「今時今日咁嘅服務態度唔夠㗎」,劉德華當年呢句口號深入民心,至近年服務業嘅待客態度經常受到批評,為提升訪港旅客體驗,旅發局下周將推出全新宣傳片,以「做多一步 好客之道」為主題,邀請近期因電影《九龍城寨之圍城》而人氣高漲嘅古天樂(圓圖)主演,加上宣萱等藝人推廣好客之道。
由古天樂宣傳好客之道,真係好啱feel。Kelly覺得,古仔外表Cool,唔鍾意笑,但其實份人好有心好溫暖,唔單止樂於提攜娛圈後輩,仲做好多善事,同香港服務業員工畀人嘅印象都有幾分相似,佢哋工作量大,但樂於為客人提供更好嘅服務,做多一步,就可以令顧客有唔同體驗。
朱鑑然片中身兼「三職」
新宣傳片將講到餐飲、零售和交通3個服務行業,由新生代男演員朱鑑然化身茶餐廳侍應、鞋舖售貨員同埋的士司機,演繹業界前線人員喺日常工作中,只要簡單做多一步,都可以一同實踐好客之道,表達香港專業、優質嘅服務精神。旅發局話,唔希望用說教嘅方式去責成各行業,而係希望平實咁鼓勵大家只要做多啲,做好啲,重塑香港好客之都美譽。
此外,旅發局發布今年首季旅遊數據,1月至4月訪港旅客數字,比去年同期上升一倍,達到1460萬人次;而五一黃金周共有76.6萬內地旅客訪港,按年增加22%。內地旅客對香港評價正面,95%有重訪意欲,92%表示會推薦親友來港旅遊,整體滿意度有8.8分(10分為滿分),呢個良好反應已經超過2018年同類嘅調查結果。旅發局表示,將於下半年繼續舉辦及支持國際大型盛事,加強唔同客源市場嘅推廣,以及推出全新夏季宣傳項目吸客。
KellyChu
最Hit
打風︱潭美與東北季候風料「疊加」襲港 會否掛八號風球? 天文台有啟示
2024-10-22 16:56
前TVB當家花旦66歲生日風采依然 獲贈「六位數美酒」曾與富商拍拖未婚產子好轟動
2024-10-22 12:00
何澤堯送別摯友
2024-10-22 11:24