KellyChu - 長情大叔茶記重遇「女神」 歎當年「冇膽鬼」｜Executive日記
KellyChu
2024-01-25 00:00
字體大小
有位長情大叔喺FB一個茶記關注組分享重遇當年「女神」故事，勾起網民共鳴。大叔後生時曾被調派長沙灣工作，經常同其他同事幫襯一間茶餐廳，只為一睹負責收銀嘅靚靚太子女。大叔歎當年「冇膽鬼」，再見返太子女時對方已經變咗茶記「揸fit人」，仲喺收銀位置放咗張家庭相，只好得閒嚟食個撻，緬懷過去。
提起呢段青澀時光，大叔話當年佢哋成班傻仔，次次入到茶記都坐晒喺收銀附近，4人卡位6人逼埋坐，可惜個個都係冇膽鬼，連同人講句說話都唔敢，最後有一位勇士真係去追太子女，竟然仲要追到！不過現時家庭相中人並非當年同事，太子女亦已變成中年師奶。
「茶記愛情故事」引起網民熱烈討論，部分人指大叔講出唔少上一輩嘅懷緬和共鳴，形容呢啲年少回憶特別珍貴。曾光顧呢間茶記嘅網友就話，老闆娘雖已中年，但五官標致，睇得出年輕時係靚女。
Kelly Chu
更多文章
