黃大仙貨Van黃格仔「甩尾」掉頭嚇窒過路清潔工網民疑涉危駕：Brake燈無着過

更新時間：12:05 2026-08-04 HKT
發佈時間：10:33 2026-08-04 HKT

網上流傳一條車Cam影片，顯示一輛客貨車向黃大仙中心北館停車場入口方向駛至，其間客貨車突然在停車場外雙白線及黃格仔「甩尾」掉頭。當時天雨路滑，一名清潔女工一邊手撐起雨傘，另一邊手拖着垃圾桶，正踏出行人路準備過馬路。她差點被客貨車撞倒，登時嚇得停下腳步呆立當場，最後目送客貨車駛走。惟片中並無指明事發日期和時間。

有眼利網民看畢片段後留言，認為客貨車「甩尾」掉頭並非意外，而是司機刻意所為，直指「Brake燈（煞車燈）無著過，即係專登拉手制玩調頭啦」。亦有網民指出客貨車違例「雙白線掉頭」，又指涉事客貨車司機是「慣犯」，涉及危險駕駛，「呢個van仔佬成日喺度飄移㗎，慣犯嚟㗎，龍翔中心車場口對出呀」。有網民則形容涉事的清潔女工「個心離一離啊」、「阿姐真係嚇L死」。