沙田早晨│潘頓告仔罕見傾兩駒
更新時間:15:40 2026-11-17 HKT
發佈時間:15:40 2026-11-17 HKT
發佈時間:15:40 2026-11-17 HKT
潘頓今季開局甚佳,連續十六期有上陣的賽日均能交出頭馬,但到近期勢頭回軟,罕有地連續兩期交白卷,不過潘頓乃冠軍級騎師,相信會積極爭取止跌回升,何況今次坐騎質態兼備,其中同告東尼合作「佐治傳奇」及「風將」最要留意,皆因今朝騎練一度走埋一齊密斟。
香港精神家俊有動靜
梁家俊今朝向「香港精神」鞍上人追問態況。
今季騎師錦標賽席位爭持激烈,季初一度有機會爭的梁家俊,近期戰績稍回落,已落後何澤堯四W,要在三次賽事反先難度高,不過唔代表停下腳步,好似今朝其坐騎「香港精神」由助手出試,巧合家俊策其他馬操練,回程時返到機坪,他便向「香港精神」鞍上人追問。
極速寶寶老蔡跟返倉
今朝「極速寶寶」到內圈加課之後,蔡約翰立即趕到機坪隧道口睇馬。
蔡約翰踏入十一月後開始上力,最近連贏三期,季內已經累積八場頭馬,當中剛戰派出初出馬「精算無雙」一出即勝,今戰另一初出馬「極速寶寶」分分鐘同樣一鳴驚人,況且今朝到內圈加課之後,老蔡立即趕到機坪隧道口睇馬,之後再跟住此駒返入馬房,動態相當肉緊。
耀寶全哥緊張跟出入

「耀寶」今朝出試前後,均見羅富全現身機坪親自主持大局。
「耀寶」今季三戰均不入三甲,但睇番次次在直路上受困,輸在意外而非實力敗不作準,今次吸引到潘頓注視,既肯超磅策騎,佢更是此駒唯一贏馬拍檔,自然值得加倍留意,而今朝「耀寶」到內圈加課亦充滿睇頭,因為不論出試前後,均見羅富全現身機坪親自主持大局。

















