沙田早晨│「顏色之皇」阿游落隧道
更新時間：16:00 2026-09-28 HKT
發佈時間：16:00 2026-09-28 HKT
發佈時間：16:00 2026-09-28 HKT
字體大小
開季前游達榮接受訪問時提到，「顏色之皇」有能力遠征英國，並有信心取得佳績，會否成行遲啲至知，不過已顯示練者睇呢隻馬睇得好高，今次復出當然做足一切準備，正如今朝試跑阿游緊張到痹，課前已親身護送此駒落隧道，課後又衝到該處接馬，全程跟到實。
超寫意輝哥厚此薄彼
「超寫意」今朝課後姚本輝行埋此駒身旁，卻未有理會同時段出跳的「輕功猛男」。
姚本輝終於交出頭馬，今次出馬更多更惡，大有機會延續勝纜，甚至連場報捷，「超」系雙雄，「超寫意」同「超輕鬆」最要留意，尤其「超寫意」今朝拍跳佔取上風譽滿欄邊，而且輝哥顯得極之大細超，課後行埋此駒身旁，卻未有理會同時段出跳的「輕功猛男」。
喜尊龍潘頓猛拍馬頸
今朝「喜尊龍」出試期間潘頓多次拍其馬頸。
從化又有多組大閘，不少騎練都北上，大哥大潘頓當然唔駛上去，但唔代表會偷懶，依舊現身晨課，五點四十分便出現試下次出賽的「實力股」，接住十分鐘後試今次參戰馬「喜尊龍」，後駒甚有睇頭，皆因潘頓相隔接近一年再次披甲，而且今朝出試期間多次拍馬頸。
凱旋王者巴度首匹試
巴度今朝到場立即為「凱旋王者」出試，之後落馬詳細檢驗馬匹。
講開「實力股」，今課已係潘頓第二課出試，換言之跑開的巴度失去帥印，雖然如此，巴度同羅富全未有芥蒂，今戰不只有合作，尚要多達四駒，儼如羅廄主帥，其中最要留意「凱旋王者」，巴度今朝六點十分到場立即為佢出試，之後落馬詳細檢驗馬匹，動靜多多。
閃電奇駿靖哥哥攻堅
今朝「閃電奇駿」同「靖哥哥」由副練盧百淇代替督操，當時佢用手機拍低過程傳畀甘敏斯。
甘敏斯今朝北上睇試閘，然而參戰馬「閃電奇駿」同「靖哥哥」依然進行試跑，由副練盧百淇代替督操，當時佢走上烽火台二樓睇馬，同時用手機拍低過程，一跳完佢立即傳畀甘敏斯，有此分析，因為過了不久盧百淇便傾電話，明顯是向甘敏斯匯報一切，鏡頭矚目。
蔡廄三駒倉主露手影
「辣得準」、「八玲瓏」及「小飛俠」今朝一齊拍跳成為焦點，課後蔡約翰接馬並跟住三駒返入倉。
蔡約翰一向唔上從化，今朝大約五點已現身晨課，不過並非太多次走出公眾席食胡位，事關出跳蔡廄馬唔算太多，所以「辣得準」、「八玲瓏」及「小飛俠」一齊拍跳成為焦點，一來上述三駒拍住走，齊齊交出好走勢，二來老蔡一貫緊張，課後接馬並跟住三駒返入倉。
