古天后日誌|港股繼續陰乾 萬八關小心久守必失

更新時間:10:50 2023-09-14
發佈時間:10:50 2023-09-14

9月14日,多雲有雨及雷暴,雨勢有時頗大。隔晚美國公布CPI,雖然高過預期,但美股個別發展,整體都算企得穩,道指只係跌70點,標指跟納指分別升5點及39點。目前標指企守4,400點,喺4,400點至4,500點之間高位整固,市場觀望等待下周三議息結果。

美國8月CPI同比上升3.7%,略高於預期3.6%,核心CPI同比增長4.3%,跟市場預期一樣,環比增長0.28%,高於預期。CPI回升,主要係去年8月基數急降,低基數效應下出現大增。環比增長較大主要係期內油價上升,令能源環節環比增長5.58%,拉升整體CPI,扣除能源後核心CPI環比只增長0.28%,略高於預期,主要係交通運輸升幅達1.96%所致,其他環節通脹又唔算勁。油價由7月初70美元邊反彈至最近接近90美元,只要油價急彈情況扭轉,理論上今年餘下時間嘅CPI唔會再向上。

外資對中企已失去信心

估計嚟緊核心CPI環比升幅會回落,主要房租已經連續五個月下跌,估計房租向下趨勢,有機會慢慢拉低核心通脹,美聯儲比較着重核心通脹,尤其係核心PCE。連環加息已打擊借貸需求增長,房價因需求減少回落,租金正在下降,不過5月後美國樓價回升,估計房租喺第四季會會見底回升。幸而二手車需求下降,車價環比再跌1.23%。另外食物環比增幅為0.23%,保持穩定,同比係已經連跌12個月,預期咁嘅情況下,CPI唔會再大幅反彈。換句話講通脹已受控,理論上息口應該見頂,目前係要留意工資及工業生產復甦下,通脹會否再度回升。

人民幣反彈,中概股企穩,只係成交淡靜,有大行又唱淡A股,指A股股市內有太多造假公司,呼籲投資者遠離,反映外資對中企已失去信心,暫時無法挽回,短期外資都唔會重返中港股市。港股喺萬八點苦守幾日,已幾次挑戰20日線不果,睇返噚日成交額不足800億元,資金遠離港股意向相當明顯。港股持續欠缺成交,只有繼續陰乾。


相關文章:

港股市況|恒指升逾百點 小米據報推新手機對標iPhone 15 股價彈逾3%
美國8月CPI升3.7% 高預期 連續2個月回升

---
《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ