古天后日誌|中美晶片之戰或成今年黑天鵝
更新時間:09:00 2023-01-19
發佈時間:09:00 2023-01-19

1月19日,天晴,天氣乾燥,早上相當清涼,日間氣溫略為回升。隔晚美股先升後跌,納指終止連日升勢,隔晚跌138點;道指跟標指分別跌613點及63點。早段因為公布12月零售銷售按月跌1.1%,創十二個月最大跌幅,反映上游企業成本的生產物價指數(PPI)去年12月按年升6.2%,低過預期的6.8%。不過睇真啲個零售銷數據,或反映衰退有機會升溫,市場憂慮經濟衰退下對原油需求減少,油價回軟,同時亦影響市場情緒。美股下跌亦拖累隔晚夜期跟ADR向下,不過暫時恒指10日線仍守得住,似乎好友未有鬆懈。

隨住新能源興起,以及科技一日千里下,石油喺能源業地位開始有變化,過往各大國喺石油市場爭霸,但喺數碼新時代下,各國戰場已由石油轉移至更重要嘅戰略資源,亦即係最近中美之間掀起嘅晶片之戰,正正係一場新石油戰爭,或關係到未來幾十年國際地綠政治權力分布,影響力不容忽視。

過去幾十年,石油一直係主要能源,相關貿易更涉及龐大利益,供需跟價格一直主宰國際地綠政治變化,以美元結算嘅油金體系,更成就美元多年以嚟嘅金融霸主地位。是故多年以嚟,美國積極介入中東局勢,而產油國亦為保自身利益而成立OPEC,以維持國際石油市場秩序。去年爆發俄烏戰爭,令歐洲陷入能源危機,正正係反映石油供需一旦失衡,或引發經濟衰退。

不過喺新能源應用漸普及下,石油唔再係唯一主要能源供應,近十年嘅汽車市場開展大力發展電力車,就明顯反映石油唔再係唯一能源供應。喺疫情期間電動車出現晶片短缺,令各國意識到,下一個戰場已轉移至晶片市場,變相削弱石油對全球經濟影響力。展望未來,進入數碼年代,數碼化跟人工智能結合,令各方面出現巨大變化,當中晶片應用涉及生活,貿易,製造業等多個行業,未來將會係得晶片,得天下。暫時美國主導技術,而中國則擁有原材料及產業鏈,兩者各有優勢,若能強強合作,全球將可受惠。無奈美國卻開始針對內地晶片企業,兩強脫鈎,變相引發晶片戰爭,最終或拖慢全球經濟發展,可能係今年對金融市場構成巨大威脅嘅黑天鵝,不得不提防。

最Hit