中手超｜港隊31:30力剋山東隊止連敗「簡氏兄弟」放工趕場披甲坦言挑戰大
發佈時間：00:47 2026-10-29 HKT
2025-26賽季中國手球超級聯賽第四階段總決賽今日（28日）迎來尾日賽事，港隊在晚上壓軸登場迎戰山東隊。港隊最終在門將梁嵐熹最後關頭一球關鍵撲救下，撲熄山東絕平美夢，以31:30力剋對手終止三連敗。「簡氏兄弟」在今晚收工後隨即趕往現場披甲，坦言對專注力有一定挑戰，兩兄弟亦樂見新血逐步接棒。
梁嵐熹關鍵撲救 助港隊力壓山東隊
上半場早段戰況相當緊湊，兩軍多次打成平手，其後山東隊加強攻勢以8:10拉開比分，並一直保持2分差距。港隊隨後展開反撲，先由李少聰博得7米罰球並由簡翊暉射入，之後「細佬」簡翊文亦有進賬，以一記快攻助港隊追成12:12平手。在上半場讀秒階段，港隊雖一度以13:14落後，但憑藉簡翊暉一記精彩的彈地「壓哨波」，助港隊以14:14扳平返回更衣室。
易邊後港隊迅速入局，在多點開花下一舉將比數拉開至21:17；惟山東隊隨後加強防守強度，步步緊逼下以25:25再次扳平，戰況重陷膠着。關鍵時刻港隊隊長謝永輝挺身而出，利用突擊機會助港隊以28:27反超，其後再由連潤滔快攻得手擴大優勢。山東隊未有坐以待斃並緊咬比分，但港隊門將梁嵐熹在尾段屢獻神救頻頻化解險境；戰至最後3秒，以30:31落後一分限期的山東隊叫暫停組織快攻，梁嵐熹挺身而出成功救出絕平一球，助港隊以31:30守住勝局，順利終止近期的三連敗走勢。
「簡氏兄弟」收工趕往場館比賽
上仗因正職工作關係向教練「請假」而缺席對江蘇一戰的「簡氏兄弟」簡翊暉和簡翊文，今日下班後再度趕到現場為港隊披甲。兩兄弟坦言，下班後隨即出戰如此高強度的比賽，要維持高度專注力是一大考驗。
今仗港隊與山東隊打得難分難解，面對對手多次頑強反撲，港隊仍頂住壓力贏下硬仗。阿文賽後認為球隊在防守端交出好表現：「我覺得我哋今日防守做得幾好，因為對方除咗要用身形去打入嚟，基本上成功率可能都係得大概50%至60%，其他都可能要靠佢哋嘅中鋒走動好多位，先至可以攞到一至兩球得分。其實已經係我哋預期裏面做得好好，邊位佢哋都好少入波，所以我覺得我哋防守係屬於中上。」而阿暉則認為對方十分熟悉球隊打法，但隊友依然頂住壓力，特別是謝永輝和陳梓朗攻入不少高難度的關鍵球，進攻表現相當「抵讚」。
阿暉今場表現亮眼攻入5分，多次操刀7米罰球皆穩穩命中。被問到個人發揮時，他笑言：「我想讚下我自己。」阿暉續指：「坦白講其實嗰啲波我都有少少緊張，但係落到場教練相信我俾我射，嗰球（尾段關鍵罰球）都有啲神來之筆入到，所以都好開心可以入到波，都想讚返自己去到最後關頭心態都保持到。」
年輕新血接棒順利 惟指揮位尚欠火候
談到昨日師弟們頂替上陣，兩兄弟均樂見新血表現，並從他們身上看到昔日熱愛打球的純粹與熱血。對於接班問題，阿暉認為：「其實我覺得真係差唔多，始終我哋兩個都唔係年輕球員。今次嘅比賽我覺得佢哋都足以證明到自己。當然進步空間仲多，但係我覺得已經可以落到場，教練都好信任佢哋。」他隨後補充道：「我覺得交棒都算順利嘅，反而係面嗰三個。即係我覺得翼位已經OK，我自己覺得因為始終『輝隊』（謝永輝）喺球場嗰個角色真係個操控性、球場大腦之類咁樣，佢好緊要。咁佢打完呢個比賽如果退役的話，之後嗰個可唔可以成功 hold 到個節奏係另一回事。我覺得睇呢個位關鍵啲，其他都好順利。」
記者/攝影：魏國謙
