黃仁勳可以被取代？ | 莫灝楠
發佈時間：13:21 2026-11-13 HKT
坊間常有一種講法：大型科技公司制度完善，冇咗邊個都得，接班人一上，機器照行。放到Nvidia身上，呢句就過於輕鬆。市場將黃仁勳視為數萬億美元市值嘅Error，唔係因為佢只係一個高調CEO，而係因為佢根本唔係傳統職業經理人。過去30年，總工程師、組織中樞、同台灣硬體供應鏈總調度，呢三個角色高度集中喺佢一個人身上，接班人好難直接複製。
扁平架構集權 一人拍板難替代
公司架構非常扁平，幾乎以佢為核心。Nvidia不設營運長，亦冇傳統事業群分權，約60至80名副總裁直接向佢匯報。佢極少同高管開一對一會議，戰略拍板同技術爭辯多數喺大群組公開進行，目的係減少資訊差同山頭主義。員工每週要交「本週最重要5件事」，由佢親自批閱，繞過層級掌握研發同客戶動態。轉身快，但亦代表公司缺少可以獨立揸fit嘅人。因為職權集中，所以唔可以求其搵個人黎頂替佢。
產品上，佢唔只係門面，而係全棧總設計師。2006年力排眾議，堅持每顆GPU內建CUDA，先至有今日AI軟件護城河；2019年拍板收購Mellanox，將高速網絡納入核心。近年更把生意由賣單顆晶片，升級到賣整櫃「AI工廠」，並打破業界兩三年一循環，改走一年一更。呢種速度係優勢，亦更綁死喺佢個人判斷。少咗呢個拍板嘅人，節奏同方向都唔會自動延續。
Nvidia係fabless，算力霸權建基於同台積電近30年嘅關係，而且帶有濃厚個人關係。早年公司陷困局時，黃仁勳向張忠謀求助，之後視對方為導師；而家喺魏哲家主政下，雙方喺先進製程同先進封裝上深度結盟。佢多次公開替台積電說話，認為貢獻被低估、加價合理，換嚟產能緊張時較易獲得優先支持。呢份信任，唔係一份普通採購合約。
對台灣伺服器同零部件廠，佢走嘅唔係高壓壓價，而係共同發財、重人情嘅共生模式。由顯示卡年代行到而家嘅AI機櫃，廣達、鴻海、緯創、美超微、華碩等台廠，好多都係長期夥伴。高階機櫃結構極複雜，生產節奏又快，台廠願意先行投入、趕工試錯，有一部分係同老黃嘅關係。而要不厭其煩再講一次，台灣而家幾乎係世界最重要嘅AI硬件工廠。
話「冇話冇咗邊個唔得」，字面聽當然無問題，但有啲企業家太重要，就唔係一個system可以替代到。但Nvidia今日嘅護城河，有技術、有生態、有商業關係，亦有一部分寫喺老黃身上。呢個模式令公司轉得快、供應鏈夠齊。投資Nvidia，唔只係睇晶片同AI需求，仲要睇呢套高度個人化嘅組織同供應鏈，有幾難被複製。無錯，好似Apple無左Steve Jobs都得，但已經唔係嗰回事。就要重新pick up另一套system。當年Steve Jobs交棒比Tim Cook都有時間交接，而家老黃突然離職，都咪話唔煩。
元宇證券基金經理
莫灝楠
