星8卦丨「阿叔」照顧「大眼」夠癡心同「呆佬」一齊開心做老竇

更新時間：11:30 2024-11-22 HKT
發佈時間：11:30 2024-11-22 HKT

講到蠢都冇人夠「呆佬」天真同冇所謂，最近做埋老竇梗係興奮，但冇諗過肚入面嗰個係咪自己。佢覺得娶到「大眼」好好彩，由於住埋一輪，大咗肚就梗係結婚，其實同時間「大眼」仲有「阿叔」呢位金主照顧住，個肚係邊個，「大眼」可能都唔知道。

「大眼」一向好叻搵老細，屋企背景複雜，自細就好叻搵有勢力但年紀大嘅老人家去照顧。「阿叔」就比較長情，咁多年都令「大眼」衣食豐足，但自知年紀大，咪出錢捧佢出嚟自力更生之餘，亦希望佢搵到好歸宿，如果對方搵唔到錢自己會照顧埋。結果「呆佬」就係咁樣被揀選，一老一嫩合力令佢入局，好快就住埋，期間兩個人好甜蜜㗎，不過「阿叔」依然係幕後操縱者。

咁多年「阿叔」都想同「大眼」有個細路，所以公佈喜訊之後，「阿叔」認為個肚自己有份㗎，對「大眼」更加不離不棄，叫佢唔使擔心生活。「呆佬」唔知咁多，認為自己目前係天下間最幸福嘅男人，對「大眼」嚟講，面同底都係真正大贏家，兩個老竇只會對自己嘅小朋友有好處，所以最近成為城中最靚大肚婆，真係冇嘢講！

其他文章：

星8卦丨「媳婦仔」賣慘其實最陰濕細佬冇陪飯被KO懵然不知

星8卦丨「組織」出街食飯成日搵着數俾人唱單獨各自各又變正常人

星8卦丨「姣精」害「直男」形象全毀正牌炮友「咸濕」偷笑甩身

↓立即下載星島頭條App↓