劉松仁最新近況曝光！復出再為音樂劇《利瑪竇》做導演 首開腔回應屢傳健康出現問題
發佈時間：12:37 2024-02-14
現年73歲劉松仁（松哥）自從在2015年拍完TVB劇《華麗轉身》後，鮮有再於幕前演出，到了2020年初，劉松仁被拍到需要以拐杖行路，更被指有手震、口齒不清，一度傳出中風，好友米雪其後代為澄清只是不慎跌傷。不過近日終傳出好消息，劉松仁精神飽滿地再現身於人前！
相關閱讀：劉松仁貼陳年靚仔相公開尋佳視女星 淡出40年曾合演《武俠帝女花》
劉松仁最新近況好健康？
小休過後，劉松仁終於重拾昔日工作的步伐，由他擔任策劃、執導及創作的音樂劇《利瑪竇》將於今年4月重演，連日來劉松仁為音樂劇進行宣傳工作，日前劉松仁以導演身份與男主角王梓軒齊齊接受TVB娛樂新聞台訪問，談到近年生活狀況，劉松仁說：「我搞《利瑪竇》之前嗰幾年，已經冇拍戲，喺籌備嗰陣，個個都問我演乜嘢，但係我發現原來我對演戲一啲慾望都冇，仲好驚啲，我其實係好內歛嘅人，好怕羞，怕露面，又唔鍾意張揚。」劉松仁還說：「我唔會再拍戲，如果再拍就唔矜貴，所以我決定唔再拍。」
對於近年屢傳健康出現問題，劉松仁笑說：「身體呀？總之係咁樣，我覺得人生係有生老病死，我哋無論喺邊個階段都好，都要活得精采，積極面對。我哋老喇，老就跟住病，病就會死，呢個過程係唔可以或缺，係一定，我就話畀自己聽，喺邊個階段都一定要精彩，就算病都要精彩，死都要瀟洒，唔好好多牽掛，我就抱住呢個態度去面對我後邊嘅路。」他續說：「唔可以因為你去到某一個階段，人哋『啄』住你嗰個病，劉松仁而家病、好悽涼，但係佢哋忘記咗之前你係拍咗50年嘅戲，點解我要畀你講我病咗？你唔講我拍過嘅戲？個個都會病，我希望人哋係講我病咗係點樣面對，呢樣嘢先值錢。困難個個都有，你點面對先係最重要。」
劉松仁昔日工作相：
劉松仁坦言享受創作與排練過程
另一方面，劉松仁坦言今次專心一致做好準備，從未為身負重任而產生壓力，劉松仁說：「Journey！旅途就係你不停咁行，只要你肯行，你就會逢遇，咁你就會一路行落去。」相反被劉松仁點名做男主角的王梓軒卻「壓力山大」：「松哥初初叫我研究個戲，我榮幸之至，但係松哥叫我演利瑪竇，我係好耐都冇答應。好大壓力喎，我何得何能？後來就係行咗先，最重要唔係我或者我嘅感受，最重要係件事喺大家心入面有個影響。」
劉松仁坦言非常享受創作與排練的過程：「真係好有力量，我哋演電視，係透過電視打入觀眾個心入面，影響你，舞台劇係成班一齊影響啲觀眾，好一致，好強勁嘅能量。每次我都睇到喊，唔知點解好感動。」雖然如此，劉松仁從未想過參演其中：「我淨係想做觀眾，我唔鍾意演戲㗎，講出嚟都好笑，我唔係享受演戲嗰啲人嚟。（但係你演咗40年喎？）係呀，唔通唔使食咩？哈哈哈。」近年在幕前甚少見到劉松仁，他坦言不會再接戲，只因所有心思擺到《利瑪竇》上：「我冇（其他）計劃，我擺晒我自己落去，我自己行緊最後嘅階段，然後裏面其中一個就係《利瑪竇》。」
新加坡國寶歌手陳潔儀擔任女主角
王梓軒指劉松仁的精神力量非常強大：「佢一入間房係好似空氣靜止咗咁，然後嗰條虛構嘅紅地氈就出嚟。」劉松仁聞言表示，從電視台年代學習到何謂「壓場」，又指過去自己太嚴肅：「後生嗰陣我好嚴肅，因為好集中諗緊點演點演，直到有次我同陳玉蓮拍嘢，佢啱啱相反。佢一入廠『點呀你哋？』好開心嘅，我嗰時學到嘢。於是，我以後返屋企見到阿媽就要笑，嘩，好有力量，我係假（笑）㗎，啲肌肉硬㗎，我唔理我E（E起棚牙），E到我真係有個笑容出嚟，母子關係產生幾大變化。以後同人傾偈傾咩都畀個笑容先，遲兩秒講都得㗎，呢樣好嘢，唔好睇少笑容。」
至於女主角方面，今次由新加坡國寶級歌手陳潔儀（Kit）擔任，劉松仁用「得意」來形容，他透露原本已經有女主角：「個戲由業餘變咗職業，監製叫我搵個再有份量啲（女主角），我話唔得，人哋喺我最艱難嗰時答應我。」最後，原定的女主角主動辭演，於是劉松仁找來鄧卒雯：「點知佢話你唔應該搵我，佢就介紹佢好朋友阿Kit。」劉松仁更隆重其事親自飛往新加坡與陳潔儀接洽：「講晒成件事、講劇情，講咗幾個鐘，咁佢去廁所，佢話喺廁所聽到首歌，好似有把聲話『你要做呀』，嚇到佢即刻應承我，好好笑。我直頭覺得係神蹟！」
其他文章：
73歲劉松仁臉色紅潤復工搞舞台劇 撐拐杖現身公開場合三年前演出期間曾跌傷
73歲劉松仁精神奕奕為愛犬切蛋糕慶生 身材日漸消瘦粉絲憂心健康
--------------------------
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
