叱咤2023｜《叱咤樂壇流行榜頒獎典禮2023》「叱咤樂壇男歌手」金獎林家謙冧莊 MC屈居亞軍冇黑面

更新時間：23:43 2024-01-01
發佈時間：23:43 2024-01-01

叱咤2023／叱咤得獎名單／叱咤我最喜愛｜叱咤樂壇流行榜頒獎典禮2023今日（1月1日）晚上7時30分在亞洲國際博覽館一號展館舉行。今屆叱咤2023最受關注的除了「叱咤樂壇我最喜愛的男歌手」、「叱咤樂壇我最喜愛的女歌手」及「叱咤樂壇我最喜愛的組合」外，「叱咤樂壇男歌手」金獎、銀獎及銅獎亦競爭激烈。今屆叱咤樂壇流行榜頒獎典禮2023「叱咤樂壇男歌手」金獎、銀獎及銅獎分別由林家謙、MC張天賦和陳卓賢奪得！

叱咤樂壇流行榜頒獎典禮2023「叱咤樂壇男歌手」金獎、銀獎及銅獎：

陳卓賢得獎後重回初心

獲得「叱咤樂壇男歌手」銅獎的陳卓賢，獲悉自己得獎後一臉茫然，被阿正取笑「樹熊樣」又走了出來，直到銅獎放在手上，陳卓賢說：「我幾年前參加過選秀節目，嗰陣我覺得有信心好多，從容同享受好多。入咗行之後，發覺有好多嘢都唔同，自己又曾經喺無數過夜晚想放棄。今次呢個獎再次提醒我，當初係因為啲乜嘢而行上呢條路，我會繼續努力，多謝大家。」

MC張天賦多謝香港依然有樂壇有觀眾

獲得「叱咤樂壇男歌手」銀獎的MC張天賦，他表示要為唱《世一》之前說小小話：「嗰陣我冇預自己拎獎，所以食緊粒喉糖，食到咁上下突然間要上台，所以我唱到中間咪咬碎粒喉糖，吞咗佢，所以表現得有啲唔好，華納世一！曾經係一個busker嘅我，好開心每次樂壇出咗好嘅歌，等我可以唱，搵到錢，而家成為樂壇嘅一份子，好多謝香港依然有樂壇，依然有觀眾，令到呢件事可以繼續行。」

林家謙每次攞獎都有啲驚

繼續冧莊的「叱咤樂壇男歌手」金獎的林家謙，依舊一貫作風地說：「其實每次攞獎都有啲驚，頭先有女歌手話冇唱片公司攞嗰個獎，好威咩？不過我都恭喜你。今年有好多喺大大小小場合演出嘅機會，有電影場合，喺海外做騷，今年係好多演出機會，令我今年反覆被肯定同被否定，但係我覺得人係要不停被否定同肯定，先可以喺心態令自己更加進步，同謙卑嘅心態。」