星8卦｜「家姐」誤信「有錢」以為有婚結做好事救「妹妹」出生天

更新時間：11:30 2023-12-15
發佈時間：11:30 2023-12-15

「家姐」性格大方，亦好明白女人喺江湖中為咗搵食，形勢唔夠強就好易俾人恰，所以佢對所有「老細」都唔敢投入真感情。初初跟「有錢」一齊，覺得對方咁多女人，自己又點會係最後一個，趁自己仲有個錢，「有錢」唔敢對「家姐」太霸道，只係貪慕虛榮，有個出名又靚嘅女人喺身邊。

久而久之，佢竟然對「家姐」求婚，仲話以後只得佢一個。「家姐」初時都覺得受寵若驚，大話講得太認真，女人總有些少天真位。但後來俾佢發覺「有錢」原來都有對其他幾個有名氣嘅女人用同一套手法，其實係唔會有結果，「家姐」勁在可以同佢啲女人和平共處，其中一個「妹妹」最唔紅又跟咗「有錢」好些時間，一直俾「有錢」食住，慢慢情緒出咗事。

「家姐」嗰種正義感出晒嚟，加埋不值「有錢」嘅所作所為，竟然同「妹妹」提出一齊住，話互相有個照應，嚇到「妹妹」以為乜事，「有錢」梗係應承，要話畀全世界知佢有本事到可以令自己所有女人都和平共處。「家姐」為咗幫「妹妹」仲成日出雙入對，好姊妹咁令「有錢」其他女人眼紅，其實「家姐」已經有部署，自己有一定地位，無謂做到太卑微，但就唔放心「妹妹」怕佢會玩死自己，惟有盡最後一份綿力幫佢重出生天，可惜「妹妹」唔爭氣，從此一蹶不振，「家姐」最後要自救，都唔理得咁多啦！